Июнь зурул 12-нний, Аьрасатнал Конституциялул кьини, Кремлилул Екатерининский залдануву Аьрасатнал Президент Владимир Путиннул паспортру буллунни оьрмулул 14 шин бартларгминнан.

https://youtu.be/guUAx-e-0OU

Шадлугърал тагьарданий паспортру булайсса «Жу аьрасатлувталлу» цIанилусса акция сакин дурну дия Аьрасатнал дуклаки оьрчIал суккушиндарал Жагьилтурал союзращал цачIуну. Ва кьини Кремлилуву паспортру ласун оьвкуну бия Аьрасатнал конкурсирттай, олимпиадарттай, спортрал бяст-ччаллай ххув хьусса ва виричусса тIул дурсса дуклаки оьрчIайн.
«ХIакьину ляличIисса кьинир – Аьрасатнал кьинир. ЦIакь хьусса аьдатрайн бувну, оьрмулул 14 шинавун уххавривун цума-цагу аьрасатлувнал ласайссар паспорт. Му оьрму бартлаганнин зуща бювхъуну бур чIярусса давуртту дан. Цаппарассаннал тIурча, зула оьрмулун нигьачIийсса ххуллий цайминнал оьрмурду ххассал бувну бур. Мукун итххявхсса зул ялун бучIантIимургу хьунтIиссар яргсса. ХIакьину шиву, Кремлилуву, билаятрал яла бюхттулмур награда – Аьрасатнал паччахIлугърал премияртту дуллуссар чIярусса шиннардий хъуни-хъунисса хьхьичIуннайшивуртту хьун дурсса инсантуран. Мукунсса каширду зухь цума-цаннахьгу душиврийн умуд бихьлай, тIайлабацIу чIа тIий ура зун », — увкунни В. В. Путиннул дуклаки оьрчIахь.
Муния махъ Президентнал миннан ккаккан бунни цала кабинет, яла бувцунни Кремлилувух экскурсиялий.
Аьрасатнал Президентнал канива паспорт ласунсса тIайлабацIу хьуминнавух бур жула лакку душ, ларгсса шинал Гъумук бярав оькьлакьисса 5 шинавусса оьрчI ххассал увсса Аида Садикьовагу. Ва лайкь хьуссар « Созвездие » тIисса Аьрасатнал МЧС-рал чулухасса премиялун.
Гъумучиял школалул 7-мур класс къуртал бувсса Аида дуккавриву хьхьичIун личаврийну, творчествалул гьунардайну чIивинияцIава чIявучил итталусса душ бур. Цимилвагу ххув хьуссар ва республикалул жура-журасса конкурсирттай балай учаврил ва къавтIаврил номинациярттай.
Барчагу буллай, чIа тIий буру Аидан ванияр тихунмайгу гьарца ишираву тIайлабацIу.

Зулайхат Тахакьаева