Майрал 10-12-нний Каспийск шагьрулий хьунни хъаннил дянивсса лачIун буккаврил Аьрасатнал чемпионат.
Чемпионат сакин дурссар Аьрасатнал Спортрал министерствалул, Дагъусттаннал лачIун буккаврил федерациялул, ДР-лул Спортрал министерствалул.
Турнир тIитIавриву гьуртту хьунни ДР-лул ХIукуматрал Председатель Аьбдуссамад ХIамидов, Аьрасатнал лачIун буккаврил федерациялул президент Михаил Мамиашвили ва чIявусса бусравсса хъамал. Чемпионатрай гьуртту хьун бувккунни 32 региондалиясса 120 спортсмен. Миннувух бия жула республикалиясса спортсменталгу.
Шанма гьантлий най диркIсса чемпионатрай ххув хьунни:
48 кило – Дарья Лексина (Краснодардал край)
53 кило – Стальвира Оршуш (Бурятия)
55 кило – Мария Гурова (Москавуллал область)
58 кило – Валерия Коблова (Москавуллал область, Санкт-Петербург)
60 кило – Любовь Овчарова (Краснодардал край)
63 кило – Валерия Лозинская (Москавуллал область, Санкт-Петербург),
69 кило – Ханум Велиева (Красноярскаллал край)
75 кило – Алена Перепинкина (Санкт-Петербург).
Финалданийн бувксса жулва душру Ххадижат Муртазялиева ва Инна Тражукова лайкь хьунни арцул медаллан. Дагъусттаннал БакIчи Рамазан АьбдуллатIиповлул цIанияту чемпионкахъан пишкаш бунни автомобиллу.
Чемпионатрал хIасиллу дуллай, Михаил Мамиашвилил бувсунни цува рязину ушиву бяст-ччаллу лавайсса даражалул сакиншиндарай хьушиврий. Ганал барчаллагь увкунни Дагъусттаннал БакIчи Рамазан АьбдуллатIиповлухь ва ХIукуматрал Председатель Аьбдуссамад ХIамидовлухь ххуйну кьамул баврихлу ва кумаг баврихлу. Михаил Мамиашвилил ялагу бувсунни ялунчIилмур лачIун буккаврил Европанал чемпионат Дагъусттаннай хьуншиврул ялув хIарачат буллай бушиву АьФ-лул ЛачIун буккаврил федерация. Шиккува ххи бан, лачIун буккаврил Европанал чемпионтал хьуссар лакку душругу: Эльмира Кьурбанова ва Зумруд Кьурбанова.
Аьрасатнал чемпионат ларкьуну махъ спортсментуран ва тамашачитуран ккаккан дунни концерт. СахIналийн бувккуна дагъусттаннал артистътал, дунияллийх цIа дурксса артистътал Александр Серов ва ансамбль «Бони М ».

Р. Къардашов