Ххувшаврил кьини Ккуллал райондалий хIисав дувайссар яла ххирамур байрандалун. Ва байран кIицI дувайссар циняв райондалул жямат лагма лавгун, чIивиманая хъунаманайн ияннин.

Майрал 5-нний Ваччиял шяраву «Абадшиврул аллеялучIа» хьуссар «Абадшиврул вахта». Ва ишираву гьуртту хьуссар райондалул школарттал дуклаки оьрчIру, учительтал, культуралул зузалт, идарарттал бакIчитал, жагьилтурал сакиншиннардил вакилтал, захIматрал ва къинттуллух зий бивкIсса ветерантал.
Цалчинмур май бучIаннин циняв шяраваллаву дурссар марцIшиврун хас дурсса субботникру, бувгьуссар 3 азарунния ливчусса мурхьру. Райондалий яхъанахъисса дяъвилул гьурттучитурал щахъаннин багьлул лахъсса бахшишру дуллуссар. ХIакьинусса кьини райондалийсса шяраваллаву яхъанай бур 23 щахъами.
Циняв шяраваллаву майрал 8-нний хьунадаркьуссар Ххувшаврил кьини ххуйсса концертирттащал ва ссупралущал.
Хъиннура кIицI дуван ччива «БивкIу бакъасса полкрал» марш. Ва маршраву гьуртту хьунни 2 азара инсан ххишалагу. ЧIяйннал шяравусса СССР-данул Виричунал ЦIаххуй Маккаевлул гьайкалданучIату сайки 3,5 километралул манзилданийх Ваччавсса майданнивсса кIийла СССР-данул Виричу хьусса АхIмад-Хан Султаннул гьайкалданучIан бияннин лавгссар Хъун дяъвилуву гьуртту хьуминнал суратирттащал. Ва маршравух гьуртту хьуссар райондалул циняв каялувчитал, идарарттал бакIчитал, зузалт, культуралул зузалт, дуклаки оьрчIру, учительтал, дяъвилул шиннардий къинттуллух зий бивкIми щахъами.
Ккуллал райондалул УО-лул дурссар дяъвилия бусласисса луттирдал выставка, «Ххувшаву» цIанилусса спортрал аьралий тIуркIу, ЦIаххуй Маккаевлун 100 шин там шаврин хас дурсса шеърирдал, балайрдал конкурсру ва м. ц.
Культуралул зузалтрал дурссар «Жу пагьму буминнах луглай буру», «Лавгмунил чIу» тIисса конкурсру.
Дяъвилул шиннардий къинттуллух зий ивкIсса 146 инсаннал шаппа-шаппай лавгун, цIуллушиву дуруччаврил идарарттал ххал дурссар вайннал цIуллу-сагъшиву.

Загьидиев Аьбдул, Ккуллал райондалул
Ветерантурал советрал председатель