Щалагу билаятрай школа къуртал буллалиминнащал архIал махъва-махъсса гюнгутIи бивщунни республикалул исправительный колониярттайсса хьхьувайсса школарттай ва миннул филиаллай 9-ми ва 12-ми классру къуртал буллалиминнангу. Гьашину вай идарарттай школа къуртал буллай бур 30-нния ливчусса инсантал.
Ва иширацIун бавхIуну, Дагъусттаннал УИС-рал идарарттай хьунни шадлугърал мероприятияртту. Учительтурал ва дуклаки оьрчIал, мукунма колониялул зузалтрал, хIарачат бунни ва кьини яргсса, дакIний личIансса хьуншиврул. Школа къуртал буллалиминнахь увкунни асар хьунсса махъру, ккаккан дунни концертрал программа.
Хъунма хIал къавхьуну шиккугу дайдишинтIиссар экзаменну, 12-мур класс къуртал буллалиминнал дулунтIиссар чара бакъа дулун аьркинсса математикалул ва оьрус мазрал экзамен, 9-мур класс къуртал буллалиминнал, вай кIирагу дакъассагу, цала язи дургьусса кIира экзамен цаймигу дулунтIиссар. Вайннул хIасиллайн бувну дуклакиминнан булунтIиссар паччахIлугърал аттестатру.
