ДР-лул Роспотребнадзор управлениялул гьар нюжмардий сияхIрайн ласлай бур суцIал кьацI увкусса гьарца иш. ХIакьинусса кьини ДР-лул медициналул идарарттайн лаивзун ур суцIал кьацI увкусса 185 инсан, миннавату 95 – оьрчI-бакI.

Азарханалий уттуишин увну ур 13 инсан. КьацI увкусса чIявуми инсантал бур Хасавюртлиясса – 22 инсан, Тарумовкаллал райондалия – 33 ва Хасавюртуллал райондалия – 17 инсан.
Къиримнал геморрагическая лихорадкалул азар дирсса иш цавагу къавхьуну бур. Роспотребнадзор инсантурайн баян буллай бур, кьатIув, тIабиаьтрайн бигьалаган лавгни, суцIал кьацI учаврия мугъаят хьун аьркиншиву. Янна дикIан аьркинссар чурх кIучI буллалисса, чаннасса рангирал. МаслихIатну ккаклай бур, вацIлувун нанийни, комбенизонну лаххан.
Агар зуйнма суцIлил кьацI учирча, га аьркинссар букьан шайссаксса ччяни, оьттувун азар къадагьаншиврул. ГацIанава яла гъанмур азарханалийн гьансса чара лякъин аьркинссар. Агарда хIакинначIан гьансса тагьар дакъахьурча, марцIсса катIригу ларххун, га кIанайх аьгъушиву дуккан аьркинссар, му чIумал суцI цуппа буцантIиссар. ЦукунчIав къабучIиссар суцIру хIайвантрая битлан дачIрасса каруннах.

ХIасан Аьдилов