Къатри дуллалаврил низам

Вай гьантрай Дагъусттаннал Национал библиотекалуву хьунтIисса «Дагстройэкспо – 2017» выставка-форумрайн дагьайсса пресс-конференция хьунни «Дагестанская правда» кказитрай.

Гьуртту хьунни муний: Александр Шевченко, ДР-лул машлул ва промышленностьрал палаталул вице-президент; МахIаммад ХIусманов, ДР-лул строительствалул, архитектуралул ва ЖКХ-лул министрнал цалчинма хъиривчу; Аьли Шяъванов, Ухссавнил Ккавкказуллал федерал округрал строительтурал гильдиялул республикалул отделениялул ассоциациялул президент; МахIаммад Саругъланов, «Дагестан -ЭКСПО» центрданул директор.
Выставкалул хъунмур мурадну сакиншинначитал ккаклай бур республикалий строительствалул ара хьхьичIуннай дансса бюхъурду ва каширду ххал дигьаву, недвижимостьрал рынок ци тагьарданий буссарив ккаккаву.
«Строительствалул комплекс хьхьичIунмай шаврийну Дагъусттаннал экономика хьхьичIуннай хъанахъиссар», — увкунни МахIаммад ХIусмановлул. Ванал кIицI лавгунни махъсса шанна шинал дянив му комплекс анаварсса бущилий хьхьичIунмай най бушиву, муницIун бавхIуну хьхьичIуннай хьушиву му аралувун инвестицияртту кIункIу шавугу.
«Къатри дуллалаву хьхьичIуннай шавриву Дагъусттан СКФО-лул субъектирдаву цалчинмур кIанттай бур. Амма ва аралуву бур ца агьамсса буруккин – цайнува цивппа къатри буллалаву. ЦIанасса чIумал МахIачкъалалив ва Каспийскалий буллалисса 900 къатлува 500 бур цукунчIавсса тIалавшиннардацIун къабакьлакьисса. Документругу цила низамрай буну, налогругу багьайсса куццуй дуллай, къатри баврил тIалавшиннарду ва кьараллугу дурурччуну буллалисса бур 400 къатта», — увкунни ванал.
Къатта ласун ччисса инсаннан маслихIат бунни министерствалул къатри баврил ялув бавцIусса отделданий цIухху-бусу бан. Бувсунни министерствалул пишакартурал дурсса экспертизалийн бувну, къатри баврил цинярдагу тIалавшиннарду ва кьараллу дурурччусса компаниярттал сияхI рирщуну душиву министерствалул сайтрай. Му бакъасса ва выставкалийгу бюхъан тIий бур къатри дуллалиминная, стройматериаллу итадакьлакьиминная, проектру дуллалиминная, ремонтру дуллалисса компаниярттая диялсса информация кIул дан.
Аьли Шяъвановлул бувсунни выставка-форумрай ххал бигьин тIий бушиву къатри давриву ишла буллансса хIукмурду. Къатри дуллансса ихтияр дулун тIий бусса бур так проект бавриву архитекторнацIун кIия-шама хъунама инженер гьурттусса компаниярттахьхьун. Ми пишакартураягу дикIан тIий дусса дур хасъсса тIалавшиннарду. Ми цивппагу бикIан багьлай бусса бур Аьрасатнал цасса реестрданул сияхIрайн лавсун. Хасъсса кIулшиву тIалав дуллан тIий бусса бур компаниярттал каялувчитураягу.
Выставка сакин хьуну дур вай бутIрая: къатри давриха зузисса компанияртту; къатри даврил цIусса технологияртту; архитектура ва проектру даву; кьатIаллил билаятирттал хъуслин кIанттай ишла дуллалисса жула билаятрай итадакьлакьисса стройматериаллу, технологияртту ва оборудование; къатри ва ххуллурду байсса техника; ххуллурду ва ламурду баврил ва бакьин баврил проектру; коммунал техника ва хасъсса автотранспорт; къатри баврин аьркин байсса ярагъ; сантехника; канализациялул ва щин дуцаврил системартту; нузру, чIавахьултту, чурттурду, дизайн.
Мукунма выставкалий ххал бигьин тIий бусса бур къатри дуллалавриву энергосурсатру харж даву чан дансса цIусса технологиярттайн багьайсса суаллугу.
Выставкалий гьуртту хьун тIий дусса дур Дагъусттаннаясса, Чачаннавасса, Къарачай-Чаргаснавасса, Ростовраясса, Пятигорскалиясса, Москавлиясса, Москавуллал областьраясса, Краснодардаясса компанияртту ва му аралуву ишла дайсса хъус итадакьайсса ва хIаллихшиннардаха зузисса 44 предприятие. Дагъусттанная выставкалий гьуртту хьун тIий дур ЖСК «Капитал-инвест», ОАО «КЗТМ», Къизлардал электроаппаратру итабакьайсса завод ва цаймигу.
Зулайхат Тахакьаева