Каспийскалий ЦБС-рал 4-мур филиалданий хьунни шаэр Бадави Рамазановлул 90 шинал юбилейран хас дурсса литературалул вечер.

Мунивух гьуртту хьунни шагьрулул 1-мур ва 6-мур школарттал дуклаки оьрчIру, ми школарттал учительтал: Аьйшат Абакарова, Сайранат Аьбдуллаева, ХIабибат Жамилова. Бусравсса хъамаллуравух бия шаэрнал душ Изабелла Ибрагьимова.
Вечер тIиртIуна филиалданул хъунмур Пакият Раджабовал. Мунил бувсунни Бадави Рамазановлуя, мунал бувтшиву кутIасса, амма яргсса оьрму.
Дуклаки оьрчIал бувсунни шаэрнал оьрмулул ва творчествалул ххуллурдая, мунал чивчумур цалчинма-цалчин бувкшиву Лакрал райондалул «Ххяххабаргъ» кказитрал лажинтирттай 1947 шинал, хъирив – «Дусшиву» альманахрай, шаэр дуклай ивкIшиву Москавлив Литературалул институтраву республикалий ва билаятрай цIа ларгсса чичултращал архIал. ОьрчIал дурккунни шаэрнал назмурдугу.
Ахирданий Изабеллал барчаллагь увкуна цила буттан хас бувсса мажлис хIадур бувминнахь.

Бадрижамал Аьлиева