БувчIлачIисса зат бур, зунмур дакъасса чIумал, жагьилтал аьркин дакъасса тIуллахун багьайшиву. Ккуллал райондалий ванияр шанна шинал хьхьичI сакин бувну буссар «Жагьилтурал центр» тIисса идара.
Ванил мурадну хъанай бур райондалий даву дуллан ччисса, цIусса пикри аьч буван ччисса жагьилтуран кумаг бавуну. Ялагу ва центрданул дуллай бур волонтертурацIун дархIусса давурттивгу. Масалдаран, райондалий шайсса чIявусса инсантал бавтIсса тяхъашивурттал, батIавурттал кьинирдай хъунмасса кумаг бувай ми цила багьайкун тIайла дуккан.
Уттигъанну на хьунаавкьура ва центрданул директорну зузисса 
ХIусманов МахIаммадлущал. Ванал бусласимур бия укунсса:
— Ценрданул агьаммур мурадну хъанахъиссар райондалул вивсса иширттавух жагьилтал шавкь дуну гьуртту шаву. Вана, 2015-ку шиная шинмай, Ххувшаврил кьини дучIан хьхьичI райондалул жагьилтал лахъайссар Щуну-Зунттул хъачIрай Ххувшаврил ттугъ бищун. Гьашину, жула райондалиясса 70 жагьил цачIун хьуну, Ххувшаврил кьини гьуртту хьуру МахIачкъалалив дуллалисса давурттавух. Жу мукунма гилу хьунабавкьуру жула райондалиясса, дяъвилул шиннардий къинттуллух зий бивкIсса ветерантуращал, бахIлай бивкIру георгийл лентарду. Гьуртту хьуру «БивкIу бакъасса полкрал» акциялувух. Хьунабавкьуру дяъвилул шиннардий къинттуллух зий бивкIминнащал, дяъвилул ветерантурал щахъаннищал.
На ва даврий зий ура мартрал 15-нния шинай. Гьашину тIабиаьт дуруччаврил шин душиву баян бувну бухьувкун, жу, жагьилтал, гьуртту хьуру райондалий мурхьру бугьаврил давурттавух, бугьарду 500 мурхь, ЧIяйннал шярава Ваччав нанисса ххуллул кIивагу чулухух.
Гьай-гьай, жучIан, чансса бухьурчагу, цала цIусса пикрирдащал букIлакIисса жагьилтал бур. Райондалул администрациялул ва Дагъусттаннал Жагьилтурал министерствалул кумаграйну миннал дакIниймур дузрайн буккан банмур бувару.
Ттущал центрданий зий бур Шамхалов ХIусайн, Кьурбайтаев Кьурбан ва ХIусайнова Субайбат. Вайннащал цачIуну дувайссар жу циняв дуван багьлагьими давурттив ва хIадур бувайссар аьркинсса чагъарду ва дуллалисса давурттал лагма лаган бувайссар райондалул жагьилтал.
ХIажимурад ХIусайнов
