Жагьилтурал Кьинилул лагрулий Р. ХIамзатовлул цIанийсса Национал библиотекалуву хьунни шадлугъ. Мунивух гьуртту хьунни ДР-лул ХIукуматрал Председательнал цалчинма хъиривчу Анатолий Карибов, ДР-лул жагьилтурал иширттал министр Арсен ХIажиев, МахIачкъалаллал шагьрулул Спортрал, туризмалул ва жагьилтурал иширттал комитетрал председатель Марат Ибрагьимов, «Ростелеком» ПАО-лул филиалданул директор ХIамзат ХIамзатов, ДР-лул Халкьуннал Мажлисрал депутат Тимур Гусаев ва м.ц.
Вайннал барча бунни жагьилтал байрандалущал, чIа увкунни миннан гьарца дуллалимуниву тIайлабацIу.
Арсен ХIажиевлул бувсунни цалла каялувшиву дуллалисса министерствалул дуллалисса ва ялун нанисса чIумуву дуван дакIнийсса давурттая. Бувсунни чIал къавхьуну Дагъусттаннай тIитIинтIишиву 600 кIану бусса Жагьилтурал центр. Му бикIан тIий бур 3 зиву дусса къатта, личIи-личIисса майданну, актовый зал ва консультация дувайсса центр бусса. Миву ччима жагьилнаща бюхълай бур цала проектрал ялувсса даву дачин дуван. Миккува бикIан тIий бур жагьилтурал захIматрал биржагу.
БавтIминнал ххал дунни «Хъинсса давуртту дуллансса чIун» тIисса цIанилусса выставка. Миккун дартIун дур махъсса 4 шинай бувсса цIусса объектирдал 600-ннийн дирсса суратру.
Ахирданий А. Карибовлул ва А. ХIажиевлул жагьилтурал политика хьхьичIуннай давриву захIмат бихьлахьисса жагьилтуран буллунни барчаллагьрал чагъарду.

Бадрижамал Аьлиева