Дуклаки оьрчIру хIаласса сайки циняв агьамсса иширттавух гьунарду ккаккан буллалисса конкурсирттавух чIявуну гьурттуну бикIай Хавчаев Муслим МахIаммадлул арснал каялувшиврулу тарбия хъанахъисса оьрчIру. Ванал оьрчIал каруннил дукъарсса затру къадикIай – синааьрщарал тIахIни-кIичIурдая тIайла хьуну, усттарну дирхьусса суратирттайн дияннин.

Залму АьбдурахIманова
Уттигъанну Оьруснал театрдануву най диркIсса фестивальданийгу Муслим, мудана куна, цала дуклаки оьрчIащал, ларххун жула лакку зумунусса чиллу-чухъригу, цува зузисса магьирлугърал школалул чулуха гьуртту хъанай ия. ОьрчIал ванащал буллалисса вихшаласса, сивсусса ихтилатралгу мяйжан буллай бия Муслим цала тарбиячитуран, ххуйсса учитель акъассагу, оьрмулуву дусгу ушиву.
Муслим ттун, оьрчIащал зун учIаннингу, республикалул ва хъуншагьрулул даражалийсса хъуни-хъунисса шадлугъирттавухгу гьур­ттуну, кувни цаппара проектирдал жаваблувнугу хIисав шайва.
Увну ур Муслим Кьукуннал шяраватусса Хавчаев МахIаммадлул кулпатраву. Шиккува учин, шагьрулий увну, хъуна хьусса Муслимлул ттущалсса ихтилатгу марцIсса лакку мазрай буллай ия.
Муслим, МахIачкъалаллал 2-мур школалий 9 классгу къуртал бувну, дуклан увххун ур профучилищалувун. Армиялий къуллугъ бан гьан хьхьичI къуртал бувну бур хьхьунилмур школагу. Армиялия махъ Художниктурал союзрачIасса заргалтал хIадур бай классгу къуртал бувну бур. Мунийгу гьашиву къадурну, профтехучилищалувун ув­ххун, тIаннуй накьич дишин лав­хьхьуну бур. Мунияр махъ къуртал бувну бур Жамаллул цIанийсса Художествалул училищагу. Дуклай уна, зий ивкIун ур балугъирттал консерварду дайсса комбинатрайгу. Мукьра шин училищалувугу дурну, дуклан увххун ур Дагъусттаннал педагогикалул университетрал художественно-графикалул факультетрайн. Гикку дуклакисса ппур­ттуву ванан аьркин хьуну дур цанна ганиннин кIулну диркIсса тIаннуй накьич даймур касмугу, чарий накьич дишаймур ва муххал усттарнал касмурдугу. Ххюлчинмур курсирай ванал язи бувгьуну бур архитектуралуха зузимур, макетру дуван лахьхьин баймур пиша. Муслимлул дипломрал даву хIисаврай дурсса чарил фонтангу цIана дусса дур Гудермесливсса Рамзан Кьадировлул чIалъаь чIюлу буллай.
Университет къуртал бувну махъ, личIи-личIисса конкурсир­ттай гьурттуну ивкIсса Муслимлул давуртту хIисав хьуну, ванайн оьвкуну бур Аьрали чувшиврул музейраву зун. Гиччагу зун увцуну ур Жагьилтурал иширттаха зузи­сса министерствалучIасса центрданийн методистну. ЦIана ва зий ур ОьрчIал творчествалул центрданий ва МахIачкъалаллал магьирлугърал школалий.
Ттущалсса ихтилатравугу Муслим чIурчIав дуллай ур пагь­му-гьунар бакъасса оьрчIру къабикIайшиврий. Так ми гьунарду ялун личин баншиврул чансса ххину хIарачат банни аьркинсса тIий ур. Педагогналмур даву дакъассагу, ва дачин дурну ур патриотизм тарбия даврилмур давугу.
Муслимлун чIа учин ччай бур вания гихунмайгу ка усттарсса, касмурдах гъира бусса оьрчIру жула дяниву чIяву буллансса тIайлабацIу ва каши-кьудрат.