ЦIусса багъру баврил план биттур дурну дур

Дагъусттаннал багъманчитурал биттур дунни цIусса багъру бугьаврил план. ДР-лул Шяраваллил хозяйствалул ва бакIлахъиялул министерствалий бувсъсса куццуй, багъру бувну бур 1125 гектарданий.

Гьашину багъру бан пландалий ккаккан бувну бивкIссар 1100 гектарданий. ДукIу бувну бивкIссар цIусса багъру 1614 гектарданий, миннувату 396 – интенсивсса журалул. Шяраваллил хозяйствалул министерствалий бусаврийн бувну, цIанасса ппурттуву бувну бур 593 гектар интенсивсса багъирдал, ми хъанахъиссар дукIу вара чIумал бувссаннияр 407 гектарданул ххишаласса. ЦIана интенсивсса журалул багъру баврил программалуха зий дур 26 муниципал сакиншинна.
Яла хьхьичIунну зий бур МахIарамккантуллал райондалул багъманчитал – 461 гектар багъирдал бувну бур, Къизилюртуллал райондалул багъманчитал – 169 гектар. Мукунма ххуйну зузиминнавух бур Ахттиял, Сулайман-Стальскаллал, Хайдакьуллал, Хасавюртуллал, Гергебиллал, Къарабудахккантуллал, Буйнакскаллал ва Дарбантуллал районнал багъманчитал.

ХI. Аьдилов