Аьрасатнаву ЭГЭ-рду дуллай байбивхьуния шихуннай хьунни 15-хъул шин. Агьалинал ЕГЭ-рдал хIакъиравусса пикрирдугу личIи-личIисса бур.

Цавай бур вай экзаменнайн къаршисса, дукьан дуван аьркинссар тIутIисса, цавайгу бур рязисса, оьрчIан чIярусса къулайшиннарду хьунни тIутIисса. Гьай-гьай, дуссар ЕГЭ-рду дулавривру тамансса бигьашивуртту. Лайкьсса баллу лавсъсса, кIулшивуртту дусса оьрчIаща, чунчIав къалавгунма, цала ичIува бунува, дуклан буххан бюхълай бур Аьрасатнал регионнайсса ччимур вузравун.
Июнь зурул 7-нний ЦIуссалакрал райондалул выпускниктуралгу дуллунни ирглийсса физикалул ва литературалул Цасса паччахIлугърал экзаменну. ЦIуссалакрал 1-мур СОШ-рай, ПатIимат Кьадировал каялувшиндаралусса пунктрай, литературалул экзамен дуллунни 9 оьрчIал, 17 оьрчIал дуллунни физикалул экзамен.
Школалий хIасул дурну дия экзаменну дулунсса цинярдагу шартIру. Вай экзаменну дуллалиминнал низамрал ялув авцIуну ия хьхьичIава хIадур увсса 15 инсан. ОьрчIал мюхчаншиву дуруччаврил ялув бацIан бувкIун бия ихтияр дуруччай органнал зузалт, мукунма, иш багьарчан, кумаг баву мурадрай, бувкIун бия медициналул зузалт.
ЕГЭ-рду дуллалисса пунктрай экзаменну дуллалиминнал ялув бавцIуну бия Акаева Ульяна, Шамсулгуев Аьли, ГЭК-рал вакил Кьурбанов ХIажи.
Экзамен дуллай байбишиннин выпускниктурахь ми дулаврил низамрая балжину бувсуна ПатIимат Кьадировал.
— Экзамендалийн телефонну, фото, аудио ва цаймигу электрон журалул техника, справочникру лавсун бучIан ва ишла дуллан цукунчIав ихтияр дакъассар. Зул каруннахь бикIан аьркинссар паспорт ва гельданух чичайсса ручка, — увкуна ванил.
ЦIуссалакрал райондалул КIулшивуртту дулаврил управлениялул хъунама Руслан МахIаммадовлул чIа увкуна экзаменнай оьрчIан тIайлабацIу ва цала язи бувгьусса вузирдавун дуклан буххаву.
ЦIуллу-сагъшиврул ссуссукьусса ва цаймигу сававрттайну экзаменнайн бучIан къавхьусса оьрчIан шанна ссятрай дулун ккаккан дурсса экзамендалул чIун ссят ва дачIиннул лахъи дунни. Цинявппа оьрчIал экзаменну дуллунни, цукунчIавсса низамраву бувксса ишру къавхьуну.

И. Саидова