Июньдалул 7-нний АьФ-лул Ухссавнил Ккавкказуллал иширттал министр Лев Кузнецовлул дунни «2016-2025 шиннардийсса ДР-лул социал-экономика хьхьичIуннай нанаву» тIисса подпрограмма дузрайн дуккан даврил хIакъиравусса батIаву. Му подпрограмма духлай дур «2025-ку шинайн дияннинсса Ухссавнил Къапкъазуллал Федерал округ хьхьичIуннай нанаву» тIисса АьФ-лул паччахIлугърал программалувун.
БатIаврий гьуртту хьунни ДР-лул ХIукуматрал Председатель Аьбдуссамад ХIамидов. Лев Кузнецовлул кIицI бунни ва батIаву тIайла дарцIуну душиву цамур агьамсса иширайн. «ХIакьину тIивтIуссар Дарбантуллал хьхьирил зуманицIухсса объектру (набережная). Ва хъанахъиссар Дарбантуллан 2000 шин шаврил таварихрал хIакъиравусса АьФ-лул Президентнал хIукмурду биттур баврил эбрат», — увкунни Лев Кузнецовлул.
ДР-лул ХIукуматрал Председательнал хъиривчу экономикалул министр Раюдин Юсуповлул бувсмунийн бувну, «2016-2025 шиннардий ДР-лул маэшат ххуй баву» тIисса подпрограмма дузрайн дуккан даврил лагрулий ккаккан бувну бур 4 объект дуван: Къарабудахккантуллал райондалийсса Гъурбукиял шяраву участокрал азархана, Дарбантлив канализациялул щин марцI дайсса сооружения, Бущихъиял шяраву райондалул азархана ва ГьуцIалтIиял ГЭС-рал бяр бансса давуртту дайдишаву. Ми объектру, Дарбантуллалсса личIаннин, гьашину бакIуйн дуккан дуллалиссар.
«2017 шинал ккаккан бувну бур дузрайн дуккан дуван Дагъусттаннал маэшат ххуй баврил цаппара проектру: МахIачкъалалив «АгроМир» тIисса теплицардал комплексрал проект, «Югагрохолдинг» тIисса теплицардал комплексрал проект, гипс ва гипсрал материаллу дуккан дайсса заводрал проект», — увкунни Раюдин Юсуповлул. Ми дакъассагу, федерал министрнахь бувсунни 2017 шинал бувну къуртал бантIий бушиву социал ва инженер инфраструктуралул 6 объект.
Масъалартту ххал бивгьуну махъ Лев Кузнецовлул бувсунни, Дагъусттаннай циняв аьркинсса луртанну ва каширду душиву гьашинура Программа дузрайн дуккан дуваншиврул.
ХIадур бувссар ХI.Аьдиловлул
