Чичул гьайкал – цамур кIанайн

МахIачкъалалив, Расул ХIамзатовлул цIанийсса проспектрайсса, машгьурсса чичу Апанни Къапиевлул гьайкал цамур кIанайн ласунсса ягу дизан дувансса (шикку тIайлану цукунсса махъ ишла банссариввагу къакIулли,цалчинна гьайкал цамур кIанайн дизан даврия ягу ласаврия чичлачисса!) хIукму хьуссар тIий бур июнь зурул 2-нний. Гьайкалданул цIусса мина дантIиссар тIар дур Дусшиврул паркраву.
Ва паркраву Дагъусттаннал Чичултрал ва шаэртурал аллея буван дакIний бусса бур, шагьрулуву личIи-личIисса кIанттурдайсса миннал гьайкаллугу дизан дурну. Мэриялул вакилнал баян бувну бур Сулайман Стальскийл ва ХIамзат ЦIадассал гьайкаллу дизан къадувантIишиву, ми цивппа бувччусса кIанттурдай дацIан дурну дуну тIий. Мукунна ка къалаянтIиссар тIар Расул ХIамзатовлул гьайкалданийнгу, му шаэрнал цала цIанийсса проспектрай духьувкун. Соцсетирдай А. Къапиевлул гьайкал дизан даврий рязий бакъа бур, агарда мукунсса хIукму бувну ягу бан тIий бухьурчагу. Гьайкал дизан даврил хавар сукку байхтува, машгьурсса журналист Светлана Анохина хIаласса группалул судрайн аьрза буллуссия. Амма му ссайн бувкссарив къакIулли. КьурчIигу, оьлугу бивзунни ттунгу му иш. Апанни Къапиев щалвагу Дагъусттаннал пахруну хъанахъисса чичур, аьраличури, Дагъусттаннал оьрус литература лахъсса шачIанттуйн гьаз дурмари. Сулайман Стальскийл ва ХIамзат ЦIадассалгу, цайми дагъусттаннал чичултрал цIардугу республикалул кьатIувсса буккултран машгьур дурмари. Дагъусттаннал миллатирттал литературалия щаллагу дунияллун хавар бикIансса давурттив дурмари. Мунал гьайкалгу дагъусттаннал культуралул хъус-ххазинар.

ПатIимат Рамазанова