Китайнавугу дусса дур ЕГЭ-рду

Къуртал хьунни гьашинусса Цасса паччахIлугърал экзаменну дуллалисса чIун. Абитуриентътурал язи бугьлай бур дуклан­сса институтру, колледжру, лахьлансса сянатру.
Экзаменнайн хIадур хъанахъисса ва ми дуллалисса чIумал цу­ксса хъювсул къабувкхьунссар оьрчIру ва миннал нину-ппу. ЕГЭ-рду дуллалисса кIанай, электрон журалул техника ишла дан цукунчIав ихтияр къадуллай, видеосуратру ласлай, низам дихьлай бия дуккаврил управлениялул вакилтал. ЗахIматри.
Амма, дазул кьатIувсса хIукуматирттайгу экзаменну дуллалийни, укунсса аваза гьаз шайривав?
ЦIанасса чIумал гьарца кIанттай ккаккияну чIалачIи буллай бур Китай, вайннал ЕГЭ-лул журалийсса экзаменнайн ГОАКАО (Национальный вступительный экзамен) учайсса бур. Экзаменну ду­сса июнь зуруйн учайсса бур «лухIи барз». ГОАКАО дуллайни, электрон журалул техника, шпаргалка ишла дарчан ягу цаманал дурсса даврия цалламур чIапIайн ци-бунугу лахъан дуллай ириярчан, га инсан экзаменная уккангу увну, оьрмулухунсса къадагъа дишайсса дур ГОАКАО дулун къаитан. Гьашину цIусса законгума кьамул дурну дур экзаменнай хьусса тIайладакъашивурттахлу инсан дуснакь айсса. Дуклаки оьрчIал цаллара дирхьусса цIакьсса низамрай лахьхьайсса дур дарсру, репетиторталгу бувгьуну, махъра-махъсса дуклаки шинай хIадур шайсса бур экзаменнайнгу. РяхцIалла паччахIлугърай дуллусса экзаменнай ларайми даражалул хIасиллу кка­ккан дурну дур Китайнал дуклаки оьрчIал. Вайннаву хьхьичIун личиншиврул, аькьлу бусса къагьану, дуккавриву итххявхссагу икIан аьркинни. ВУЗ-равунсса конкурсрай ца кIанттайн тамахI бивхьусса усса ур 200-300 инсан. ХIисавравун ласайсса бур абитуриентътурал цIуллу-сагъшиврул тагьар, спортрал ва творчествалул кьадру-кьиматру, ас-ламусрал ва мяърипатрал даража ва м.ц.
90-ку шиннардил ахирданий Китайнаву дукьан дурну дур украсса дуккаву. Арцу дакъахьурчан, ласайсса дур банкрай кредит, мугу лахъайсса дур ду­ккаву къуртал хьувкун. Шинай­сса дуккаврихсса багьа бусса бур 60-120 азарда къуруш, яла сий думи ВУЗ-ирдаву – 240 азарда къуруш. (Жула МГИМО-лул шинайсса дуккаврихсса багьа – 480 азарда къуруш).
Китайнал ВУЗ-ирдал лахъсса даражалул кIулшиву дуллалишиву мяйжан буллай бур дунияллул хьхьичIунми ВУЗ-ирдал сияхIрайгу вай лавайми ххуттардий бушиврул.
Дазул кьатIувсса паччахI­лугъирттая букIлай бур чIявусса дуклан ччисса оьрчIру. Пик­ри бусса бур 2020 шинайннин ВУЗ-ирдавун кьамул бан дазул кьатIату бувкIсса бачIи миллион студентътурал.

Руслан Къардашов

ДР-лул ВУЗ-ирдавусса бюджетрал кIанттурду бусса бур:
ДГУ –1871
ДГПУ – 1486
ДГТУ – 935
ДАУ – 860
Нархоз – 700
ДМА – 485