Июнь зурул 16-нний МахIачкъалалив ДР-лул Печатьрал ва информациялул сипталий хьунни Аьрасатнаву 2013-2018 шиннардий терроризмалийн къарши бацIаву мурадрай дуллалисса давурттая агьалинахь цукун бусланссарив маслихIатру буллалисса («Методические рекомендации по информационному сопровождению мероприятий Комплексного плана противодействия терроризму в РФ на 2013-2018 годы») семинар.
Шикку гьуртту хьунни ДР-лул печатьрал ва информациялул министр Рашид Акавов, республикалул СМИ-дал ва террорданийн къарши бацIаврил комитетирттал вакилтал.
Семинарданий видеолийхчIин ихтилат бунни КIулшивуртту дулаврил аралуву ва интернетраву Терроризмалийн ва экстремизмалийн къарши бацIаврил национал центрданул аналитикалул отделданул хъунмур Александра Быкадоровал. Ванил бувсунни террорданийн къаршисса давурттаву СМИ-дахь цуксса бияла буссарив. – Миннул хIарачат бан аьркинссар, жула халкьуннаву буттал буттахъая шихуннай кьадру-кьиматрай диркIмур хьхьичIун ласлай, террорданул идеология къакьамулсса пикрирду цIакь буллан. Хаснува ва даву щирикIин дан багьлай бур интернетраву, жагьи-жугьулт интернет­раву чялишну бухьувкун, — увкунни ванил. Александра Быкадоровал бувсунни ва даву цукун, ци журалий дурну хъинссарив, бунни мюнпатсса маслихIатру, кIицI лавгунни террорданийн къаршисса давриву журналистурал итабакьлакьи­сса гъалатIру.
— ЦIана информациялул дяъви нанисса чIун дур. Журналистурал материаллу дикIан аьркинссар буниялагу цала тIутIимур хIуччардайну мяйжан буллалисса, инсан бакIрай ацIан ан кумаг хьунсса. Экстремизмалул ва терроризмалул идеология ппив дуллалими жуярва чялишну бур, миннаща бюхълай бур цала ххуллу тIайласса бушиврий мукIру бан аькьлу-кIулшилул балжан бувасса жагьилтал. Гьарица каналданий вайннал ляхълай бур цала аудитория. Журналистуран аьркинну бур миннуяр ялтту дуккансса, дюххансса, асар хьунсса материаллу чичлан. Материаллу чIярусса рищаврищал, ми чIявуссаннал ду­ккингур аьркинсса, — тIий бур А. Быкадорова.
Ихтилат къуртал хьуну махъ семинарданул гьурттучитурал буллунни суаллу, бувсунни кIицI лавг­сса масъалалул хIакъираву цалвами пикрирду.
А. Аьбдуллаева