Майрал 21-нний Республикалул волейболданул фестиваль тIитIаврий гьуртту хьунни Дагъусттаннал БакIчи Рамазан АьбдуллатIипов. Фестиваль сакин дурссар ДР-лул Халкьуннал Мажлисрал Дуккаврил, элмулул, культуралул, спортрал, туризмалул комитетрал, республикалул Спортрал министерствалул, Дуккаврил ва элмулул министерствалул ва республикалул волейболданул федерациялул.

Турнир дуллай бия МахIач­къалалив Маркаровлул цIаний­сса спортшколалий, бяст-ччал­­ливух гьуртту хьунни 112 команда – азаруннаяр ххишала­сса инсантал. Миннавух бия дуклаки оьрчIру, вузирдал студентътал, министерстварттал ва ведомстварттал зузалт, Да­гъусттаннал волейболданул ветерантал. ЧIявусса тамашачитал бувкIуна цалла командарттацIун кабакьин.
Фестивальданийн бавтIми­н­нал хьхьичI махъ лахълай, Рамазан АьбдуллатIиповлул увкунни: «Лаваймур даражалул ус­ттаршиврул спорт байбихьлахьиссар чIявусса инсантал гьур­ттусса спортрава, хаснува волейбол, мунил аргъ цIана дизлазиссар, му машгьур дуллан аьркинссар. Жулла профессионал команда тамансса хьхьичIуннай лирчунни Аьрасатнал чемпионатрай, цIана ванил билаятрал командарттаву 24-мур кIану бугьлай дур».
Волейболданул СССР-данул цачIунмур командалул капитанну ивкIсса Вячеслав Зайцевлул бусаврийн бувну, Аьрасатнаву цIанасса ппурттуву хъинну машгьурну бур волейбол. «На барчаллагь тIий ура Дагъусттаннал БакIчинахь ва волейболданул федерациялухь, укунсса байран сакин даврихлу», — увкунни Олимпиадалул чемпионнал.
Физкультура ва спорт маш­­­­­гьур даврихлу дуллунни па­ччахIлугърал наградартту. «ДР-лий физкультуралул ва спортрал бутIуву лайкь шаврихлу» тIисса медаль дуллунни Республикалул оьрчIал спортрал школалул директор Александр Маркаровлун, волейболданул Дагъусттаннал ветерантурал цачIундур командалул капитан Гъазияв АсхIабовлун ва цайминнангу.
ДР-лул БакIчинал цIа чирчу­сса ссятру пишкаш дурунни цаппара вузирдал командарттал тренертуран. Яла ДР-лул БакIчинал командалул ва бусравсса хъамаллурал командарттал дянив хьунни 2 тIуркIу.