Уттигъанну Каспийскаллал Кадетътурал хьхьирил школа-интернатрай хьунни ЦIу дагьавриясса мюхчаншиврул кьинилун хас дурсса батIаву.

Бадрижамал Аьлиева
Кадетътуращал хьунабакьин бувкIун бия Каспийскаллал надзорданул даврил отделданул инспектор, виваллил къуллугърал капитан Ринат Ибрагьимов ва Кадетътурал хьхьирил школа-интернатрал выпускник, Аьрасатнал МЧС-рал Воронежуллал паччахIлугърал цIу дагьавриясса мюхчаншиврул институтрал курсант, виваллил къуллугърал чIивима лейтенант Башир ХIажиев.
Дуклаки оьрчIал бувсунни пожарду ци-ци журалул дикIайссарив, цIу къадагьаншиврул ва, балики, дагьну махъ цукун къуццу тIун аьркинссарив. Мура темалийн багьай­сса ихтилатру бунни педагог Татьяна Аязовал, библиотекалул хъунмур Татьяна Галимовал. Кадетътурал хьхьирил школа-интернатрал преподаватель Айдемир Мирзахановлул бувсунни ва аралуву цукун­сса даву дачин дурну най буссарив дуклаки оьрчIащал. БавтIминнан ккаккан дунни пожардаясса ва ми хьун къаритавриясса видеофильмру.
Ва кьини кадетътурачIа хъамалу хьусса Ринат Ибрагьимовлул ва Башир ХIажиевлул бувсунни пожарный къуллугърал даврия, кIицI лавгунни цIу дагьаврил чIявумур чIумалсса багьанану шайшиву бургаву дакъа кьабивтсса мюрщи оьрчIру, инсаннал биччи бакъулшиву, масалдаран, розеткалувура кьадиртсса зарядное устройство. Оьвчаву дунни оьрчIайн, пожарниктурал кьюкьри щаллу дуван, ва бусравсса пиша язи бугьан. Ва школалул выпускник Башир ХIажиевлул барчаллагь увкунни школалул администрациялухь ва учительтурахь, махъа нанисса ник тарбия давриву буллалисса хъунмасса захIматрахлу, кIицI лавгунни ва школалий цалла ларсъсса кIулшивурттая хъунма­сса кумаг хъанай бушиву вузравусса дуккавриву.
Ахирданий школалул директор Оьмар Оьмаровлул барчаллагь увкунни хъамаллурахь укун мюнпат бусса хьунабакьаврихлу.