Вай гьантрай МахIачкъалалив хьунни Дагъусттаннал региондалийсса «Справедливая Россия» партиялул вакилтурал пресс-конференция. Микку вакилтурал бувсунни 2016 шинал агьалинал социал оьрмулуцIун дархIуну цалла дурсса даврил хIасиллая.

Региондалийсса «Справедливая Россия» партиялул совет¬рал председатель, ДР-лул Халкьуннал Мажлисрал председательнал хъиривчу Камил Давдиевлул бувсунни агьалинал социал оьрмулувусса иширттан хас бувну бувсса фракциялул агьамми докладирттая, кIицI лавгунни вай масъаларттал тагьар мархлуцIакул даххана дуван багьлай бушиву. Ванал мукунма бувсунни «Справедливая Россия» партиялул 73 субъект¬рай хIасул дурну душиву агьалинал мурадру буручлансса экспертътурал группарду бусса партияртту.
Пресс-конференциялий ихтилатру бунни ДР-лул Халкьуннал Мажлисрал депутатътурал Марат Алияровлул ва Рафик Асланбаговлул.
Журналистътурал депутатътурахьхьун буллунни ихтиярду къадуллусса кIанттурдай къат¬ри даврил ва цаймигу масъаларттал хIакъиравусса личIи-личIисса суаллу.
Къатри даврил масъаларттаха зузисса депутат Марат Алияровлул бувсунни социал объектру дан итадаркьусса аьрщарай чIяру зивурду дусса къатри дуллай бушиву. Ва масъала низамрайн буцаву мурадрай, региондалийсса партиялул отделениялул мюнпатсса маслихIатру ккавкшиву.
ХIакьинусса кьини хъинну цIурювкьусса масъала бур дух хьусса къатрава агьали цIусса къатравун бизан буллалаву. Бизан буллалими бур цала ихтиярду ссуссукьу дуллай бур тIий, рязи бакъа. Партиялул вакилтурал цала ихтилатирттаву чIурчIав дунни агьалинал ихтиярду ссуссукьу дуллалисса ма¬съалартту властьрал органнащал цачIуну щаллу булланшиврий.

И. САИДОВА