Аьрасатнал Президент В.В. Путиннул гьашинусса шин баян бувссар Экологиялул шинну. Республикалий Экологиялул шин даншиврул цIакь дур­ссар 2017 шинал дан аьркинсса давурттал план. Ми давурттаву агьамсса кIану бугьлай бур вацIрацIун цIу лачIун къадитаврил давурттал.

ХIасан Аьдилов
ВацIрацIун цIу лачIаврил хьхьичIалу кьукьаву мурадрай гьар шинах буллай бур 100 километралул манзилданийсса ххуллурду ва бувми бакьин буллай бур. ВацIри цIу дагьаврия буруччаву мурадрай бувну бур «Да­гъусттаннал вацIри цIарая ххассал баврил центр» (Дагестанский лесопожарный центр) тIисса паччахIлугърал автономсса идара. Га щаллу бувну бур аьркин-къарциндалул. Мува куццуй­сса центрду бувну бур личIи-личIисса районнайгу. Агарда вацIри ижаралий лавсун бухьурча, миннан аьркинссар вацIри цIарая буруччаврин хасъсса давуртту дансса кьай-кьуй хIадур дуван. ЦIу дагьарча миннал аьркинссар баян бан диспетчертурал къуллугърайн ва цIу лещан дуллан. ПаччахIлугърал вацIрал инспектортурал ххал бигьай­ссар чIумуя чIумуйн вацIраву цIу дагьаврия мюхчан шаврил тIалавшинну бартдигьлай бушаву. 215 маршрутрай сайки 2005 километралий щаллу дурну дур вацIрах хIисав ласайсса кIанттурду. ВацIрацIун цIу дагьаврил иширттая хавар бай­сса диспетчертурал кIанттурду бувну бур.
ХIадур дурну дур цIараяту мюхчан шаврин хасъсса давур­ттал план, хIала-гьурттусса давурттал хIакъираву кьутIирду чирчуну дур Аьрасатнал МЧС-ращал ва Аьрасатнал МВД-лущал. Дагъусттаннал БакIчинал цIакь дурссар 2017 шинал республикалий вацIрацIун дагьсса цIу лещан даврил план. ВацIрацIун дагьсса цIу лещан дуллан хIадур увну ур 90 инсан. Мартрай хьу­ссар цIу лещан даврил ученияртту.
ЧIявумур чIумал вацIлуцIун цIу дагьаврил тахсиркар инсан шайссар. ВацIрацIун цIу дагьайссар миннуя арх дакъа шяраваллил хозяйствалул аьрщарай кьаркьсса уртту ччучлачисса чIумал. Мунияту республикалий ХIукуматрал кьамул бувну бур къурдарав кьаркьсса уртту, ххулув ччучлан къадагъа дишаврил хIакъиравусса хIукму. Кьаркьсса урттуцIун ва вацIлуцIун цIу щаврихлу тахсир хьумунай ачIа дишайссар 1000-нния 5000 къурушрайн дияйсса, бюхъайссар хIатта дуснакьравун акьингу.