Шяъван барз

«Шяъван зурул гайминнуяр лавайшиву МухIаммад Идавсил (с.аь.с) гайми идавстураяр лавайшиву куннассар». ( ХIадис)
Шяъван барз хъинну ххирасса, даража хъунмасса барзри.
Му зурул хьхьичIра-хьхьичIсса цIузурул хьхьуну ацIния кIира ракат суннат-чаклил дарча, алхIам бувккуну махъ гьарца ракатраву ххю-ххюва кьулгьугу буклай, ацIния кIиазара шагьиднануксса чири бу­ссар, ацIния кIира шинай эбадат дурссаксса чиригу чичайссар, ни­ттил увсса кьини куна бунагьрая марцI шайссар. Муния тихунмай мяйцIалва гьантлий мунал хатIагу къачичайссар.
Ва зурул ацIния мукьунния ацIния ххюннийнсса хьхьунийн Бараатрал хьхьу учайссар. Кьурандалийгу мубараксса хьхьу хIисаврай ккаккан дурну дуссар. Бараат тIиссагу «марцI буккаву» тIиссар. Муъминтал му хьхьуну Аллагьнайн дуаьрттай бикIайссар, цала бунагьирттал ялтту учIу тIий. МухIаммад Идавсин (с.аь.с), ссавруннайн урувгун, арулвагу ссавнил хьулурду тIивтIуну, ссавруннайсса циняв малаиктал суждалийн багьну ххал хьуссар, МухIаммадлул (с.аь.с) умматиннал аьпа ба тIий. Гьарца арулвагу хьулийгу малаиктал ккавк­ссар, гьархьхьуну эбадат дурманансса хъинбаларду бувманансса даражарду, чирирду, тIий оьвтIий. Яла Идавсгу (с.аь.с) ххари хьуну, мунияр махъ гьарца шинал му хьхьу уттара дуллай ивкIссар. Бараатрал хьхьуну гьарца ссавнил хьулурду тIитIайссар. Шанттуршва рахIматрал хьулу тIитIайссар, Алжанну чIюлу байссар, малаиктурал байранни. Му хьхьуну гьарцаннал му шинаву бувсса аьмал ссавруннайн лахъайссар. Му хьхьугу уттара дурну, му кьинигу зума дугьаврил даража хъунмассар. Щалвагу зуруй зума дугьан къабюхъайнал шанна кьини барз байбихьулий, шанна дязуруй (13-мур, 14-мур, 15-мур гьантрай) ва зурул ахирданий­сса шаннагу кьини дургьуну хъин­ссар. МухIаммад Идавсил (с.аь.с) щалва Шяъван зуруй зума дугьай­сса диркIун дур.
Шяъван зурул хъирив бучIан­тIиссар дунияллийцири бусурманнан ххирасса Рамазан барз.
Ххирасса лак! Ххуйсса давур­ттив дуллай, духхан дувара зула къатравун исламрал диндалул нур. Мунищалла зул дакIурдивун духхантIиссар хIалимшиву. Ужа­гъирттайн бучIантIиссар барачат. Дуллалимуниву тIайлабацIу баннав, гьарнахьхьун цIуллушиву дулуннав, оьрчIру тIайла бавцIусса хьуннав! Я, Аллагь, лакрал миллат­равун рути рувхIанийшиврул нур! Кумаг бува жул миллатрал кьини дюхъангу, иш бачингу!

П. Рамазанова