Илкинсса, чаннасса хьуннав зул ххуллу

Май зурул 25-нний щалагу билаятрай бивщунни махъва-махъсса гюнгутIи. Ва кьини шагьрулул кIичIиртту чанна лахъан бувну бикIай кIяла гьухъращалсса, лентардащалсса дуклаки оьрчIал ва душваврал. ЯбатIин къахъанай, буруглан бикIай вайннах лагма-ялттуми, чIа тIун бикIай тIайлабацIуртту.
Гьашину ЦIуссалакрал райондалий школа къуртал бунни 205 оьрчIал. Миннава 87 оьрчI ур Новостройрайсса школардаясса. ЦIуссалакрал райондалул бакIчи ХIажи Айдиевлул, школа къуртал буллалими барчагу бувну, ххуллухъиндарансса махъру увкунни.
ТIюхчардал школалий

Гьашину ТIюхчардал школалий хъанай дур шамилчинсса выпуск, 11-мур класс къуртал буллай бур 11 оьрчI (классрал каялувчи Аьлиева Аьжа Нураттиновна), 9-мур класс къуртал буллай бур 5 оьрчI (классрал каялувчи ХIажиева Самира ХIажиисуповна).

МарцIну ххювардай гьашину школа къуртал буллай ур Амир Аьзиев, лавайсса кьиматирттай – Жамиля Аьзиева ва Эмилия ХIусайнова.
Школа къуртал буллалиминнахь ххуллухъин учин бувкIун бия шяраваллил жямат. Бусравсса хъамаллуравух ия Халкьуннал Мажлисрал депутатнал кумагчи МахIач Акаев.
Аьрасатнал Ттугъ гьаз бан вихшала дунни хьхьичIунну дуклакисса ХIасанов МахIаммадлуйн ва Султанов Султаннуйн.
ОьрчIру цIусса оьрмулул ххуллийн тIайла буклай, тIайлабацIу чIа тIутIисса ихтилат бунни школалул директор ЩайхахIмад Дадаевлул, классрал каялувчитурал, цалчинсса учительтурал.
— Школалия лавгун махъсса зул оьрму зула дакIнин ччикунсса хьуннав, зул дакIнийсса мурадру-хияллу бартлаганнав. Ва бигьа бакъасса заманнай хьунадакьинтIиссар зул оьрмулуву захIматшивуртту, амма на мукIрура зу миннул хьхьичI ник къарищунтIишиврий ва ТIюхчардал школалул цIа бюхттулну ларсун нантIишиврий. Чаннасса, илкинсса хьуннав зул ххуллу, — увкуна ЩайхахIмад Дадаевлул.
Школа ххуйсса кьиматирттай къуртал бувсса, личIи-личIисса олимпиадарттай ва конкурсирттай ххув хьусса оьрчIан дуллунни грамотартту ва бахшишру.
Выпускниктуралгу цала чулуха щихакIуй къалархьхьусса бахшишру – «хъиншиврухлу», «иминшиврухлу», «куртIсса кIулшивуртту дулаврихлу», «цIакьсса тIалавшиннардахлу» ва мукунна цаймигу медаллу дуллунни гьарица учительнан цанна-цанна даркьумур.
ТIюхчардал школалий махъсса шиннардий аьдатравун дагьну дур выпускниктуран личIи-личIисса номинациярдал медаллу дулаву. Гьашинусса выпускниктураву бия «школалул мусил фонд», «аькьлулул кьулла», «хIал бавкьума», «спорт – му оьрмур» тIисса медаллу лайкь дурми.
Ва кьини лахъа-хъун бунни учительтал – юбиляртал: оьрмулул 70 шин бартлаглагисса географиялул учительница ПатIимат ХIамзатовна, оьрмулул 60 шин хъанахъисса байбихьулул классирттал учительница Шамай Неъматуллаевна ва 50 шин бартлаглагисса оьрус мазрал учительница Зумрут Бадруттиновна. Бахшишругу дурну, барчаллагь увкунни школалул оьрмулуву чялишсса гьурттушинна дуллалисса нитти-буттахь: Зарема Камаловахь ва нитти-буттал комитетрал председатель Аьлил ХIажиевлухь.
Махъва-махъсса гюнгутIигу бивщуну, выпускниктал тIутIал кацIурдищал цала цалчинсса учительтурачIан гъан хьусса чIумал якьама бувккунни оьрчIругу, учительтал ва нину-ппугу. Яла цинявппагу гъан хъанай, выпускниктурал гьухърай тIайлабацIуртту чIа тIутIисса чичрурдугу дуллай, дакIний личIансса суратругу ришлай бия.

Гьамиящиял школалий

Махъра-махъсса занг цума-цагу школа къуртал буллалиминнал оьрмулуву дакIний личIансса асарду кьабитайсса, оьрмулуву цал шайсса зат дур. Ва ххуллухсса жул аьрххи хьунни Новостройрайсса Гьамиящиял школалийн.

КIулсса куццуй, вай щархъаву ЦIуминалийн бизаврицIун дархIуну захIматшивурттугу чIярусса хьунадакьай. Вай захIматшивурттахьхьун рай къабуллуну, оьрчIан ххуйсса тарбиягу, цIакьсса кIулшивурттугу дулун хIарачат буллай зий бур Султаннул душ ПатIимат Надировал каялувшиндаралусса Гьамиящиял школалул учительтурал коллектив.
Гьашину ЦIуминалийсса Гьамиящиял школалий хьунни шамилчинсса выпуск.
Школалий хIакьинусса кьини дуклай ур 152 оьрчI. Гьашину школа къуртал буллай ур 11-мур классрал 5 выпускникнал ва 9-мур классрал 13 выпускникнал. МарцIсса ххювардай школа къуртал бунни Тамазаев Сурхайханнул.
ОьрчIру барча бан бувкIун бия ЦIуссалакрал райондалул администрациялул бакIчинал хъиривчу ХIажи ХIажиев, Гьамиящиял шяраваллил бакIчи Аркадий Надиров ва цаймигу бусравсса хъамал.
Учительтурахь барчаллагь тIутIисса ва оьрчIру барча буллалисса ихтилат бувна Гьамиящиял школалул нитти-буттал комитетрал председатель Дибирова Софиял.
Мажлис къуртал хьуну махъ учительтуралгу, дуклаки оьрчIалгу рирщунни дакIний личIансса суратру.

ЦIуссачIурттащиял школалий

ЦIуминалийсса ЦIуссачIурттащиял школалул итабавкьунни шамилчинсса выпуск. Гьашину ва школалий 11-мур класс къуртал бунни 5 оьрчIал, 9-мур класс – 11 оьрчIал.

ДакIний личIансса, бюххансса махъру увкунни цала выпускниктурахь 11-мур ва 9-мур классирттал каялувчитал Лаура АьвдурахIмановал ва Залина Халиловал, цалчинсса учительтурал, оьрчIал нитти-буттал.
Школалул директор Темирбулат Адамовлул дуллунни грамотартту хьхьичIунсса оьрчIан.
Бивщунни махъва-махъсса гюнгутIи, выпускниктурал ва мюрщи классирттал оьрчIал кувннал кувннан дунни дакIний личIансса бахшишру.

Чапаевкаллал школалий

ЦIуминалийсса Чапаевкаллал школа тIивтIуну гьашину хьунни 7 шин. Ва школалий царагу шин къашай медальданий школа къуртал буллалисса оьрчIру бакъасса.

Гьашину школа къуртал буллай бур 14 оьрчIал, миннава 2 оьрчI най ур мусил медальданийн; 9-мур класс къуртал бунни 24 оьрчIал. Учительтурал коллективралгу, школалул директор Камил АхIмадовлул хIарачатрайнугу, Чапаевкаллал школалул дуккаврил хIасиллу мудангу ххуйсса дикIай. Щак бакъар гьашинусса выпускрал оьрчIаягу вания тихунмайгу цала ххирасса учительтал ва нину-ппу ххари бансса цимигу хавар баянссар тIисса.

Андриана АЬБДУЛЛАЕВА,
Имара САИДОВА