Майрал 1-нний ДР-лул БакIчи Рамазан АьбдуллатIипов гьуртту хьунни Интнил ва ЗахIматрал Кьинилун хас дурсса митинг-концертрай МахIачкъалалив, Оьруснал театрданул хьхьичIсса майданнив.
Митинг тIиртIунни Дагъусттаннал профсоюз организациярттал союзрал председатель Аьбдулла МахIаммадовлул.
— Цалчинмур майрал кьини – му жулла цашиву чIалачIи дуллалисса шадлугърал кьинир. Шиная шинайн ва байран гьартану, я бацIанну дуллай бур республикалул каялувчитуралгу, МахIачкъала шагьрулул администрациялулгу, политикалул партияртталгу, профсоюзиртталгу хIарачатрайну. 
Гьай-гьай, захIматсса масъалартту уттигу чIявусса бур, жува ми щаллу булланну, халкьуннащал машварартту буллай, кувннай кув бавкьуну, хIала-гьурттуну», — увкунни ванал.
ДР-лул Халкьуннал Мажлисрал депутат, цIуллушиву дуруччаврил зузалтрал профсоюзирттал комитетрал председатель Зумруд Бучаевал увкусса куццуй, ва байран хъанахъиссар гьарца кьинисса цалва захIматрайну гьунттийсса кьини дузал дуллалиминнал, цалва билаят тIутIайх бичин буван кумаг буллалиминнал, цалва кулпатрал барачат ххи буллалиминнал кьинину.
Ихтилатру къуртал хьуну махъ, дугу-дурккуну, кьамулгу дунни митинграл резолюция, га дия захIматкашнал ихтиярду дуруччаврил сиптардан хас дурну.
Мичча Рамазан АьбдуллатIипов увкIунни Родопуллал бульварданийсса шадлугъирттайн. Гиккун бавтIминнахь аьла-ссалам буллай, региондалул каялувчинал бувсунни ялу-ялун чIявусса дагъусттанлувтал гьуртту хъанай бушиву республика хьхьичIуннай хьун давриву.
— Жу хIарачат буллай буру Дагъусттан марцI буккан буван ва цIу буккан буван. 2016 шинал хIасиллайн бувну, промышленность лядуккан даврил индексран хасну Дагъусттаннал цалчинмур кIану бувгьуссар Аьрасатнал федерациялий. Аьркинни зун, захIмат буллан, цIу-цIусса зузи кIанттурду дузал буллан, — увкунни Дагъусттаннал БакIчинал. Ялагу цал барча увкунни циняв бавтIминнахь чаннасса Интнил ва ЗахIматрал Байран.
ХIасан Аьдилов
