Жу ттинингу биялсса бусарду Москавливсса лакрал жагьилтурал ккурандалия, танил дуллалисса давурттая.
Гьарца алхIаткьини дихьлай бур ниттил мазрал дарсру.

ЧIумуя-чIумуйн буллай бур лакрал жагьилтал цачIунмай бансса спортрал бяст-ччаллу. «Гъази-Гъумучи» фондращал цачIуну март зуруй дурссар волейболданул турнир «Лакку улклул кубок». Ххувшаврил байрандалул хьхьичI гьантрай Москавлив «Луч» стадиондалий хьунни Сиражуттин Илиясовлул завалунсса футболданул турнир – «Лакку улклул кубок -2 — Москавлив». Муния бувсунни Москавливсса лакрал жагьилтурал ккурандалул каялувчи Рашид ХIасайниевлул.

Турнирданий гьуртту хьуну дур Лакрал, Ккуллал, ЦIуссалакрал ва Ахъушиял районнаясса 14 команда: Москавливсса лакрал жагьилтурал, Ккуллал (кIира команда), ЧIяйннал (кIира команда), Хъусращиял, Чапаевкаллал, ДучIиннал, НицIавкIуллал, Бархъаллал, ЦIуссаккуллал, ЧукIуннал, ЧIарттал. Ххув хьуну дур Ккуллал команда, кIилчинмур кIану бувгьуну бур ЧIяйннал (цалчинмур) командалул, шамилчинмур кIану – Хъусращиял командалул (ларгсса шинал цалчинмур кIану бувгьусса).
Сакиншинначитал барчаллагьрай бур Гитинаев Ибрагьимлул кулпатрайн, гьурттучитал ва турнирданул цинявппа хъамал хъамалу баврихлу.
Рашидлул бусласаврийн бувну, лайкьсса даражалий кIицI ларгун дур лакрал жагьилтурал Ххувшаврил байрангу. Лавгун бур Новодевичий хIатталлив, АхIмад-Хан Султаннул ва Наби Аминтаевлул гьа­ттардийн. Муния махъ Совет Союзрал ххюягу Виричунал суратирттащал гьуртту хьуну бур «БивкIу ба­къасса полкравух».
Байрандалул хъиривсса гьант­райва, чIявусса хъамалгу бувкIун, Миллатирттал къатлуву хьуну бур лакрал магьирлугърал мажлис. Муния бувсунни ккурандалул ца чялишсса уртакь, лакку мазрал дарсру дихьлахьисса Айманат Нурдуевал. Мажлисрал программалий ккаккан дурну дур лакрал тарихрая, хьхьичIунсса инсантурая ва багьу-бизулия бусласисса хъун да­къасса сурат. «Намус» ансамбльданул ккаккан дурну дур миллатрал къавтIавуртту. Бивхьуну бур Казбек Мазяевлул «Удрида бава» тIисса пьесалувасса бутIа.
Хъинну махIатталгу, ххаригу хьуссияв, 1970-ку шиннардил ахирданийва чивчусса, уттисса никиран кIувагу къакIулсса, кIулминнангума сайки хъамабивтсса пьеса лякъикьай тIий, Москавлия ттучIанма оьвкукун. Пьесалуву аьч дурсса тема – жагьилсса кулпатру шагьрурдайнмай бивзун лаглай, щархъурдугу дачIра хъанай, ниттил мазгу хъамабитлай бушиву. Гъумук школалий дуклакисса чIумалва ва пьеса бувккуну махъ хъинну асар бивзсса Айманатлул маслихIат бувну бур му ккаккан бан. «Зувиллий­хъайсса шинну ларгун дур ва пьеса чивчуния шихуннай, миллат миха-тиха бивщуну бур, лакрал щархъурдугу сайки духралагавай дур. Амма ватандалухсса ччаву жула оьттуву тартун духьунссар, му жула яхIлийн кьутI тIий дур», — тIий бур Айманат.
Мажлисрай ялагу ккаккан дурну дур душ була учин лагаврил аьдат­гу.
Жагьилтурал хIадур бувсса мажлисран лайкьсса кьимат бишлай, барчаллагьрай ур «Дагъусттан» культуралул центрданул хъунама Арсен ХIусайнов.

Зулайхат Тахакьаева