«Ккулла кунна, щунни дакIницIун Ватан»

ГъапI кусса ссавнилу, вайварттал ккурккай,
Ккулла кунна, щунни дакIницIун Ватан…-

ПасихIсса лакку мукъул ссихIирчи, шеърирдал накьич ва хатI ляличIинува усттарсса заргал ХIасан КIуруховлуятусса макьала мунал цала мукъурттийну дайдишин ччан бивкIунни. Дакъану тIий ттулла мунал пасихIсса мукъул чIарав дишинсса пасихIшиву. Муналмур мукъул бюхъаву ляличIиссара дуну тIий. Муналмур мукъул тIилисин ххишалану ссигъасса буну тIий. Оьруснал поэзия Лермонтовлул, Есениннул гьаз бувсса даражалийн лакрал поэзия гьаз бувсса шаэр уну тIий.
ХIасаннущал на кIул хьуссияв «Илчилийн» зун бучIаннинма. На школалий 9-мур классраву дуклакисса ппурттуву, ттуйн Дагъусттаннал жагьилсса чичултрал совещаниялийн оьвкуна. Расул ХIамзатовлул кабинетраву чIирттаравусса, сахIибулхайр дусса жагьилнал, ттул чIаравнай хьуну, бувсуна ттул шеърирду чIал къавхьуну «Дусшиву» альманахрай буккантIишиву. ХIасан таний Руслан Башаевлущал му журналданий зий уссия, амма ттун ганиннин цува къаккавкссия. Тти вагу цу артист урвав тIий бура литература ххирасса. ЧIарав щябивкIсса шаэр Булбул Оьмариевал бувсуна «чIирттаравусса артист» ХIасан КIурухов ушиву. ХIакьину шагьрулуву бачIи чиваркI чIирттараву бунугу, таний нажагь бакъа чувнай чIири къаххал хьунтIиссия. ЧIири битайва артистурал, элмулуха зузисса цаппара аьлимтурал. Бавкьуну бия ХIасаннуй чIири. Утти, укунсса затру сивсуну чичин шайсса оьрмулуву бухьувкун, мукIру хьунна: ХIасан ттунгу найунува ххуй ивзуна. Ххуй бивзуна мунал пасихIсса ихтилат. Хъярчру ххирасса мунал яла учайва: «Зунттал кьанкь гьан дурасса хIаллу бусса душничIан ссалам булун гъан хьуссияв, лухIи бархатрал гьухъа ттуйнма оьвтIий бусса кунма бивзун», — куну. Хъярчру усттарну капливун бувтун бан кIулсса ХIасаннул жул коллективраву гьарманал оьрмулул мутта лахъи бувхьунссар. Даврий тIурчарив ХIасан хъинну тIалавшинна дусса ия. Ххаллилсса шаэр ушаврицIун му ия ца макьала чирчуну дачIи шинай, шинай буккулт му макьалалия гъалгъа тIутIи бувайсса бюхъу бусса журналист. Багьайний багьайкун махъ чичингу, учингу кIулшивруцIун, ХIасаннул дия му махъ сивсуну учайсса ва чичайсса чувшивугу. ХIакьинусса кьинигу дакIнийссар буккултран аьрщи зузи дуван халкьуннахьхьун дулун аьркинссар тIисса мунал макьалалул цукунсса аваза бувтун бивкIссарив. Му колхозирттал муттаэ ия, гьарма, хIукуматраха къазий, цахава цува зун аьркиншиврий дакI дарцIуну ия. Душмануксса къаччия мунан лагъшиву дувулт, халкьуннахлу бувккун, кьянкьану махъ учинсса гьутру бакъулт. Къаххирая лажинлякъулт. Жущала зянкьлий гъалгъа тIисса инсан жу ХIасаннучIан гьан уллан бикIайссияв, мунал жуйнма гьужум байманай цIакьсса чидар бишинсса кIулну. Ца ппурттуву на ца депутатнаща интервью ларсъссия. Му жулла райондалул даву дащуй дихьлай ия ттущалсса ихтилатраву. Кказит итабавкьуну кьакьансса мугьлат бакъа, райондалул вакил ттуйн лахъунттай увккуна. Депутатнайннияр ттуйн гьужум буван бигьархха. Му хIалатраву кабинетравун увхсса ХIасаннул райондалул вакил ттухь багъишла ити учин увна. ХIасаннун хъинну ххуйну законнугу кIула, бан-битанмургу кIула. На мудангу учара, жун, «Илчилий» зузиминнан, бюхттулсса школа хьуссар Казбек Мазаевлул, Руслан Башаевлул ва ХIасан КIуруховлул школа куну. ХIатта Академия учирчагу, хъун махъ къахьунссар, ми шамагу хъинну гьунар бусса буну тIий, миннал учаймунил ва чичаймунил бияла мудангу бюхттулсса бивкIун тIий ва буну тIий. Ми дунияллул литература ххуйну кIулсса, оьрмулуву ва политикалуву хъанахъисса иширттал хIакъираву цала-цала кьянкьасса позиция бусса коллегахъул бивкIун тIий.
Журналистикалия хавар ласурча, ХIасаннул ттуйн вихшала дикIайва. Макьалалуву къухънану калима дуварча, ягу оьрус махъ ишла буварча, «ПатIимат Рамазановал макьалалуву мукун чивчуну бикIан къааьркинссар» тIий, дяъван икIайва. ХIасаннул цала рирщусса суратрал цIа дизавривугума гьунар бия. Ванал суратру ххилтIу дуллай, ккалай бура суратирттан дирзсса цIарду: «БюрукъатIа. Жу ссавурив цалавхьхьусса буру», «КIюрхнил хъатлий», «Пашманшиву вил, буттахъал аьрщий!», «Ххаржандалул щаву куннасса ттул аьрщий!». Буттал къатрал суратрал лув укунсса чичру дур: « На вай къатраву увкссара дунияллийн, ттул дакI уттигу вай къатравур дусса, чурхмур танийва шагьрулийн бивзссар». Якьамашиву руртунни дакIнивун ХIасан Вихьуллал шярава нани ххуллий машиналул рульданух щяивкIсса суратрал. Машиналул дагьанттуву чIалай дур махъ лирчIсса шяравалу, суратрал лувгу дур чичру: «Хъинну дикIу, ххирасса аьрщий!». Ва буттал аьрщарахь барчаллагь тIутIисса суратрайнува чIалай бур ХIасаннул дазу дакъасса ччаву диркIшиву буттал аьрщарах. Ца ппурттуву буссия ХIасаннун «Вин кIуллив? Ттул буссар пашмансса миллат, Ватангу, кьинигу лякьлух дарххусса!» тIисса ххару хIалал битан къахъанай, муная буттал аьрщи къаххира шаэр уллай сукку хьуссагу, «Прощай, немытая Россия, страна рабов, страна господ!» увкусса Лермонтов ватандалухсса дазу дакъасса ччаврил ччувччуну лавгсса шаэр ивкIшиву кIулнугу буна. ХIасан КIурухов нахIусса махъру бусу-укултраяр , санаъру дувултраяр ххишалану буттал кIану ххирасса ушиву кIулнугу буна.
ХIасан КIурухов хъунасса шаэр ушиврул барашинна дуллай дур мунал ца-ца ххуттардилла:
Ххябувккунни бургъил кьинилул хханхха
Ягу: Барзунттал лирчунни зунттардил чарсса
Ягу: ЛархIунни цIияллу, цIаннал кIу дурну
Ва ялагу: Дагьну дур кьинилул кьяпува кьабакI…
ХIасаннул творчество дахьвару лахьлантIисса, буллантIиссару мунал творчествалун хас бувсса мажлисру. Журив, жулва коллектив язисса шаэрнацIа ва ххаллилсса коллегацIа шаврил къумашиву кьюлтIа тIий, Заннайн барчаллагьрай буру ХIасан жула коллективравун тIайла ацIан уваврихлу.
Цува цIуцIи шаний унува, дакI данмур чичлай ия жучIан. Цува бюхханну шеърирду ккалаккисса аудиозаписьру гьан дуллай ия. ДакIурдил къювугу, къумашивугу дассан дуллалисса хъярчру буллай ия. «ХьхьичIажарттащал» тIисса шеърилуву, цува «хьхьичIажарттащал ивзун, хъюву щяивкIун ура, гьис-гьис тIисса дюхлулий, дарссунни дакIнил къюву» тIий, ХIасан чичлай ур:

Ци кIулссар ттун кIа Заннал
Ци чивчуну буссарив.
Укунсса кIюрхру ттигу
Дуссарив, дакъассарив.
Дунияллия гьарчагу, къагьанссара, ХIасан, ина жул ятинтал хьусса дакIурдива.

ПатIимат Рамазанова

Суратирттай: ХIасан ттун ккавксса ппурттуву
Вихьлия нани ххуллий буттал аьрщарахь барчаллагь тIисса сурат


 

Зувирахъул шиннардийсса дусшиву

ХIасан КIурухов ттун ччянива кIулссия, зувирахъул шиннардил хьхьичIва. Дахьа литературалувун ухлахисса жагьилсса шаэр унийва.

ЧIявусса ишру хьунни вай махъсса шиннардий, чIярусса дахханашивуртту билаятрай хьунни, амма ттул ва ХIасаннул дусшиву, цIакь хьурча дакъа, хъисрагу даххана къархьунни. Ялунгума, шинну наниссаксса, жул дусшивугу, цаннал цаннайнсса вихшалагу цIакь хьунни, цаннал цаннахсса хIурматгу ххи хьунни, цаннан цагу ххуйнува бувчIай хьунну. Вай махъсса шиннардий жу, личIи-личIисса шагьрурдай бакъача, личIи-личIисса континентирттай яхъанай бивкIру. Амма жу, интернетраву соцсетирдай бакъагу, оьрмулувугу дахIаву дунура, хьунабакьлайнува, цаннан ца ккаклайнува бивкIру.
Махъа-махъ ттун ттула дус ккавкссия гьашину март зуруй. ЗахIматсса цIуцIаврил азурда уллай унугу, му, хьхьичIава куна, ххаллилсса ихтиварлув ия. Му чувшиврий захIматсса азарданущал талай ия, махъра-махъмур патрон харж дуваннин тIиссакссагу, кьянкьану авцIуну ия. ХIатта, патронну къуртал хьуну махъгума, виричу куна шайсса куццуй яхI буллай ия. Мудангу, махъва-махъсса ссихIирачIагу мунал чIарав бия дакI тIайласса оьрмулул дус Зина.
ЗахIматри ттун дусная, дунияллия лавгманая куна, гъалгъа тIун. КьурчIину бур лавгссар учинмагу. ХIасан КIуруховлул бувтссар яргсса оьрму. ЧIявусса хьуссар мунал оьрмулуву дакIний личIансса, караматсса ишру. Авадансса дия мунал дакIнил дуниял. Му ия нитти- буттал ххаллилсса арс, миллатрал язисса арс, вихшаласса уссу, талихIрайсса лас, аякьа дусса ппу, душваврал наслу чIувну ххирасса жагьилсса ттатта, дакI тIайласса дус, гьунар бусса шаэр, журналист, интеллектуал, дакI-аьмал хъинсса, оьвхъусса чув, ва, яла-яларив, цила икIайкунсса альфа-мужик. Гьамин, укунсса ХIасан кIулли жун, мунал дустурангу, цинявннангу, укунсса инсанну дакIнийгу итанну жува ва дунияллий сагъну буссаксса.
Марат Акчурин, шаэр, чичу
Америка, Лас-Вегас

* * *
ХIасан КIурухов чIявусса дустал бусса инсан ия. Му дустурачIан Улан- Батордайн, Пекиннайн, Лас-Вегасрайн лагайва, мунал гьалмахтал Дагъусттаннайнгу бучIайва. Марат Акчурин Американавун ивзун, тих мина дирхьусса чичу ур. Гьамин мунал оьвкунуя ХIасан март зуруй Американавун лавгссагу. Рязину икIайва ХIасан дустурая, кьини дуркни, шайкун чIарав бавцIунни, цува ччаннай ацIан уван шаймур буллай бур тIий. Соцсетирдай жижара бувссия нагу Марат Акчуриннухь, ХIасан дунияллия лавгсса кьинива. Гава кьини Маратлуя кIа ялув кIицI лавгсса чагъар бувкIунни. Гьан дунни Маратлул ХIасаннул махъра-махъсса суратругу.

ПатIимат Рамазанова