ЦIуминалийн дирзсса цIуссалакрал щархъаву аьдатравун дагьну, гьарица шинал шадлугърал даражалий хьунадакьай 1-мур Майрал байран. Цинявппа щархъавасса агьали ва байран хьунадакьин цачIун шай трестрал чIаравсса майданнив.
Ва ххуллухгу майданнив бивщуну бия дуки-хIачIиялущалсса чятирду, балайрду тIий, агьали тяхъа буккан буллай бия райондалул Культуралул центрданул артистътал.
Агьали барча буван бувкIун бия ЦIуссалакрал райондалул хъунама ХIажи Айдиев ва Дагъусттаннал Халкьуннал Мажлисрал депутат Амирхан Амирханов ва цаймигу бусравсса хъамал.
— ДакIнийхтуну барча буллай ура байрандалущал. Инт чантI учаврил асардацIун дархIусса, чаннасса, ххарисса ва байран агьалинан ца яла ххирамур дур. ХьхьичIрасса чIуннардий кунна, ва байрандалул инсантураву аьлтту дуллай дур тархъаншиву, дусшиву, тIайлашиву, захIмат ххирашиву исват буллалисса яла агьамсса хасиятру. Барчаллагьрай ура, райондалул ахIвал-хIал хьхьичIунмай баву мурадрай захIмат буллалисса, шяраваллил хозяйствалул зузалтрахь, кIулшивуртту дулаврил, культуралул, цIуллу-сагъшиву дуруччаврил аралуву зузиминнахь, бизнес дачин дурминнахь ва цаймигу давурттай зузиминнахь. ЧIа тIий ура гьарица инсаннан цIуллушиву, давриву тIайлабацIуртту, инт кунма чаннасса хьуннав зул оьрмурду, — увкуна ХIажи Айдиевлул.
Байрандалущал агьали барча буллалисса ихтилат бувна Амирхан Амирхановлулгу.
Ихтилатру къуртал хьуну махъ, райондалул Культуралул центрданул зузалтрал ккаккан дурна тяхъасса концерт.
Хъирив майданнив байбивхьуна Райондалул администрациялул бакIчинал чулухасса призирттал цIанийсса спортрал личIи-личIисса бяст-ччаллу. Вайннуву гьурттушинна дан бюхълай бия байрандалийн увкIсса цума-цагу инсаннаща. Майданнив жагьилтал бястлий гьаз дуллай бия путру, ритлай бия чIатIаракIру, тIанкIа тIий, лечавуртту дуллай, ккаккан буллай бия спортрал гьунарду. Шиккусса спортрал бяст-ччаллу къуртал хьуну махъ, жагьилтал лавгуна ЦIуссачIурттащиял школалул спортзалдануву волейболданий буклан.

И. Саидова