МарцIшиврул ва узданшиврул ххуллий

Гьашинусса шин билаятрай Экологиялул шинну баян баврицIун бавхIуну, ЦIуминалийсса ЦIуссалакрал гимназиялий хьунни экология ядаврин ва дуруччаврин хас дурсса тамансса мероприятияртту. Гимназиялий ва ххуллухгу хьунни «Буттал улклул экология: буруккинну ва ми бартбигьаврил ххуллурду» тIисса «ккуркки столданул» даву. Ванил агьаммур мурадгу бия дуклаки оьрчIавун тIабиаьт дуруччаврихсса гъира-шавкь рутаву.
Шикку гьурттушинна дунни ЦIуссалакрал ва Къумтуркъалаллал районнал школардал дук­лаки оьрчIал, учительтурал ва кIулшивуртту дулаврил управлениярттал вакилтурал.
«Ккуркки столданул» даву дачин дурну бия ЦIуссалакрал КIулшивуртту дулаврил управлениялул хъунаманал хъиривчу Светлана Къудаева.
Гьуртту хъанахъиминнал дия тIабиаьт ва экология дуруччаврин хас дурсса жура-журасса ххаллилсса проектру. ТIабиаьтрал чIава ахттарчитурал республикалул конкурсрал призер хьусса ЦIуссачIурттащиял школалул дуклаки душ ХIажиахIмадова Зияратлул проект дия Каспий хьхьирил экологиялун хас дурсса. «ЧIава краевед» республикалул конкурсрал призер хьусса Шушиннал школалул дуклаки душнил хъуннасса даву дурну дия ЦIуссалакрал райондалул тIабиаьт ахттар даврин хас дурсса проектраву. Экология ядаву ва дуруччаву тIалав дуллалисса проект сакин дурну дия ЦIуссалакрал гимназиялул дуклаки оьрчIал.
«Ккуркки столданул» даврил лагрулий ххал бивгьунни тIабиаьт дуруччаврин хас бувсса масъалартту ва ххал бивгьунни ми щаллу бансса чаранну.

И. Саидова