Дагъусттан Республикалул кабакьаву дунни «ЧIявусса халкь гьурттусса футболданул кьини» («День массового футбола») тIисса Аьрасатнал фестивальдануцIун.
2010 шиная шиннай «ЧIявусса халкь гьурттусса кьини» дайссар гьар шинах футболданул Дунияллул халкьуннал федерациялул (FIFA) ва футболданул ассоциациярдал Союзрал (UEFA) хъаттиралу.
МахIачкъалалив футболданул байран дунни майрал 20-нний «Труд» стадиондалий. Фестиваль тIитIаврий махъ лавхъунни республикалул физкультуралул ва спортрал министр МахIаммад МахIаммадовлул. «ХIакьину республикалий футболданий буклай бур 200 азаруннаяр ливчусса инсантал. Гьар шинах дуллай бур футболданул чемпионат, Дагъусттаннал кубок, мукунна цаймигу турнирду. Дагъусттаннал футболданул бакI командану хъанахъиссар Аьрасатнал чемпионатрал лаваймур даражалул дивизиондалуву дуклакисса «Анжи».
Буклакияра футболданий ва ххув хъанахъияра», — увкунни министрнал.
Фестиваль тIитIаврий махъ лавхъунни Дагъусттаннал футболданул союзрал президент Будун Будуновлул.
«Ттун хъинну тIааьнну бур цIуницIа ттулва хьхьичIвасса дустал ккаккан, вайннащал ттул тамансса шинну хьуссар ца майданнив цачIу футболданий буклай. Ттул пикрилий, ва футболданул байран ттинияр шихуннай гьар шинах дулланссар, чIяву-чIявусса инсанталгу хIала-гьурттуну», — увкунни Будуновлул. Махъ лавхъунни мукунма Аьрасатнал хъаннил цачIундур командалул тренер Юрий Шагьмурадовлул.
Футболданул кьинилий ччалли дурккунни 8 команда. Миннувух дия республикалул министерстварттал ва ведомстварттал командартту.
Га кьини футболданул турнирду республикалий хьуссар циняв кIанттурдай, Каспийскалий «Анжи-Арена» стадиондалийгу.
ХIадур бувссар
ХIасан Аьдиловлул
