ХIакьинусса кьини хъуннасса агьамшиву дусса, дунияллул тахсиркаршивурттан ххуллу кьукьинсса цIакьгу, бюхъу-даражагу бусса организация хъанай дур дунияллул халкьуннал дянивсса уголовный полициялул организация – Интерпол.Интерполданул гьану бивзун бур 1923 шинал. ЦIубутIуй шивун духлай диркIун дур 17 хIукумат. Мунияр махъ, дунияллул полицайтурал арарду, хIала-гьурттушиву цIакь хъанан диркIукун, муния хъуннасса, гуж бусса организация хьуну дур. ЦIанасса чIумал шивун духлай дур 190 хIукумат. Мунил штаб-квартирагу бур Палангнаву, Лион тIисса шагьрулий. Ва сий дусса подразделениялул бюро Аьрасатнал билаятрайгу зий бур. 1990-ку шинал сентябрь зурул 27-нний Интерполданул Генерал ассамблеялул 59-мур сессиялий Совет Союз кьамул дурну дур Интерполданувун. 1991 шинал, январь зуруя байбивхьуну, НЦБ (Национал цент­рал бюро) хъанахъиссар Аьрасатнал ихтиярду дуруччай органну ва паччахIлугърал органну, Интерполданувун духлахи­сса хIукуматирттал органнащал хIала-гьурттуну зузисса МВД-лул подразделение.
Интерполданул бюро тIитIайхту, цIакь хьуну дур Аьрасатнал ихтиярду дуруччай органнал ва чил билаятирттал уголов полициялул дахIаву, гьаз хьуну дур личIи-личIисса хIукуматирттайх ппив хьусса тахсиркартал лякъаврил хIасиллу.
Аьрасатнал НЦБ-лул подразделенияртту зий дур хIакьину билаят­рал 80 региондалий. Мунил подразделение зий буссар жула респуб­ликалийгу. Дагъусттаннал ихтиярду дуруччай органнал сипталий хIакьину луглай бур 600-нния ливчусса тахсиркартурах. Миннавух бур оьхIалсса, кIусса тахсиркаршивуртту дурссагу. Махъсса ппурттуву хъуннасса къулагъасралун ларсун дур интернетрацIун дархIусса, къалпсса арцу итадакьлакьисса, закондалуцIун къабавкьуну наркотикру, ярагъ ишакаш буллали­сса, хIарамсса даруртту бахлахисса тахсиркаршивуртту, автомототранспортрах луглагисса ишру.
Дагъусттаннал МВД-вусса Интерполданул подразделениялул дахIаву дуллай дур цинярдагу республикалул ихтиярду дуруччай органнал ва мукунмасса чил билаятирттал къуллугъирттал дянив тахсиркаршивуртту ашкара дан.
Республикалий хьусса тахсиркаршивурттал хIакъираву, (агана ми дазул кьатIаллищал дархIуну духьурча), хъиривлаявуртту дуллалисса чIумал, бюхъайссар чил билаятирттал хасъсса органная аьркинмур кIул бан, тахсиркарнах щалагу дунияллий луглай бушиву баян бан, мукунма дарцусса автомототранспортрая баян бан, хархавар бакъа акъа хьусса инсан лякъин, гьарица билаятрал цала-цала законну душиврийн бувну, вай иширттаву мадара дахшишругу хьунадакьайсса дунугу, — тIий ур виваллил иширттал министерствалул вакил Республикалийсса Интерполданул подразделениялул зузалтрал, полицайтурал даву дакъассагу, дуллалиссар оператив ва аналитикалул давугу.

ДР-лул МВД-лул
пресс-служба
ХIадур бувссар
А. Аьбдуллаевал