Дагъусттаннал хъаннил съезд

Май зурул 23-нний МахIачкъалалий Оьруснал театрдануву хьунни Дагъусттаннал Хъаннил союзрал съезд. Гьуртту хьунни шикку республикалул шагьрурдаясса ва районнаясса 510 делегат.

Съездрал даву дайдирхьуна бусса оьрмулий Дагъусттаннал Хъаннил союзрал хъунмурну бивкIсса, Дагъусттаннал халкьуннал шаэр Фазу Аьлиева дакIнийн бутаврийну. Президиумраву бия ДР-лул Халкьуннал Мажлисрал жяматийсса ва диндалул цачIушиврул, миллатирттал дянивсса арардал комитетрал председательнал хъиривчу Людмила Авшалумова, Республикалул культуралул министр Зарема Буттаева, миллатирттал политикалул министр Татьяна Гамалей, Дагъусттаннал Хъаннил союзрал председательнал бигарду чIумуйну биттур буллалисса Интизар Мамутаева.
Съездрай гьуртту хьун бувкIми барча буллалисса ихтилат бувна Дагъусттаннал ХIукуматрал Председательнал цалчинма хъиривчу Анатолий Карибовлул.
— Республикалий хъанахъисса гьарицагу иширттавух, арамтураяр махъун къабагьну, хъаннил хъунмасса захIмат буллалиссар. КIицI лаган ччай ура хъами ялу-ялун чялишну хIала бухлай, зий бушиву паччахIлугърал управлениялул къуллугъирттайгу. ХIакьинусса кьини Дагъусттаннал Халкьуннал Мажлисраву бур 7 хъамитайпа, 3 хъамитайпа бур министрнал къуллугъирттай зий, 17 хъамитайпа бур шагьрурдал ва районнал администрациярттал хъуниминнал хъиривчуталну зий, мукунма республикалий цикссагу хъами бур идарарттал ва ведомстварттал каялувчиталну. Зу дуллалимуницIун кабакьиннав, дунияллий дакьаву хьуннав, оьрчIая тирхханну ккакканнав, — куна А. Карибовлул цала ихтилатраву.
Дагъусттаннал Хъаннил союзрал уттинин дурсса ва гихуннай дуллантIисса даврия бусласисса ихтилат бувна Интизар Мамутаевал.
— Хъамитайпа – му жула оьрмулувусса яла агьамма инсанни, хьхьичIва-хьхьичI жунма оьрму буллусса нинур. Мунияту жун пикри хьунни республикалул кIулшивуртту дулаврил идарарттай душваврал советру сакин буллансса. Му идара сакин баврил агьаммур мурадгу душвавран кулпатру буван ва ми кьиматрай ябуван лахьхьин бавур. Республикалул БакIчинал сипталийн бувну кьамул дурссар оьрчIан кIулшивуртту ва тарбия дулавриву нину-ппу жаваблув буллалисса закон. Вагу хьуссар кулпатирттацIун дархIуну дуллалисса хъуннасса агьамшиву дусса давуну, — увкуна Интизар Мамутаевал.
Хъирив ихтилатру бувна республикалул хъаннил союзирттал председательтурал.

И. Саидова