Стоматологиялул агьамсса масъаларттавасса ца му хъанахъи­ссар ортопедиялул кумаграл даража лахъ баву. Мунияту ттизаманнул стоматологиялуву ялу-ялун ххуй дуллай бур ккарччал протезру баву ва муницIунна ккарччив хъин даврил технологиялул журардугу.Ххинчулул чу хъин буллалисса хIакинтуран кIулну бикIан аьркинссар ишла дуллалисса материаллаяту. Махъсса ппурттуву ккарччив хъин дайсса производствалуву ишла дувайссар чIярусса цIусса конструкциялул клиникалул ва кумагрансса материаллу ва миннуцIунсса технологиярттугу, гьар шинах 25%-рал цIу дуккан дуллай. Мунил тIалав дуллалиссар стоматологиялул ортопед-хIакинтурал давуртту ялу-ялун цIу лаган даву.

Му темалийн хас бувну бур «Ортопедическая стоматология. Материалы и технологии» тIисса учебник (дарсирдал лу). Лу чивчуну бур Дагъусттаннал медициналул академиялул профессортал А. И. АьбдурахIмановлул ва Оь. Р. Кьурбановлул. Ва лу утти итабавкьуну бур шамилчин. ХьхьичI итабавкьуми луттирду сянаткартуран кьамул хьуну бур ва дуккаву хьхьичIуннай дайсса Федерал институтрал маслихIатну ккав­ккун бур ва лу билаятрал вузирдал стоматологиялул факультетир­ттал студентътуран дарсру лахьлан ишла буллан.
Дагмедакадемиялул ФАК-лул ва ППС-рал стоматологиялул кафедралул маслихIатну ккавккун бур ДГМА-лул Совет­рал ва лу тIайла буккан ДР-лул ПаччахIлугърал премиялунсса конкурсрай гьур­тту хьун. Лу конкурсрай гьуртту хьун хьхьичIун ласаврицIун кабакьу бувну бур МахIачкъалаллал, Каспийскаллал, Къизилюртуллал, Дарбантуллал, Хасавюртуллал ва Буйнакскаллал стоматологияр­ттал поликлиникарттал зузалтралгу. ЧIяру-чIярусса хъин чулий­сса кьимат бищавуртту дурну дур стоматологиялул хъин байсса ва дуккайсса идарарттал, АьФ-лул Москавуллал медициналул вузирдал хьхьичIунми профе­ссортурал.
АьбдурахIманов АхIмад Иман­шяпинал арс ур профе­ссор, ДР-лул лайкь хьусса хIакин, дуккаврил ва элмулул лайкь хьусса зузала, медициналул элмурдал кандидат, Аьрасатнал Минздраврал Дагъусттаннал паччахIлугърал медакадемиялул стоматологиялул кафедралул хъунама. Кьурбанов Оьми Рамазаннул арс ур РАЕН-далул член-корреспондент, дуккаврил ва элмулул лайкь хьусса зузала, медициналул элмурдал доктор, Аьрасатнал Минздраврал Да­гъусттаннал паччахIлугърал медакадемиялул стоматологиялул кафедралул хъунама.
Жул корр.