Ибрагьимлул арс Сяъдуллагь Абакаров

Аьрасатнал Федерациялул лайкь хьусса хIакин, медициналул элмурдал доктор, профессор, диплом лавсун махъсса дуккаврил Аьрасатнал медициналул академиялул ортопедиялул ва аьмсса стоматологиялул кафедралул хъунама, стоматологиялул факультет­рал декан.
Увну ур 1953-ку шинал ЦIуссалакрал шяраву, Ттур­чIиял ва Чараваллал жяматрая­сса буттал ва ниттил къушлий. Бур кIира щарссаницIасса ххюва оьрчI.
Яхъанайгу, зийгу ур Мос­кавлив. Гьарца шинах май зурул байбихьулий учIай Дагъусттаннайн, ияй буттал гьаттайн. Хьунаакьай гъан-маччаминнащал. ­Уккай Лакку кIанттайх.

1 Цукунсса хьуна оьрчIний вийнма яла гужсса асар биян бувсса зат, иш?
-Ми чансса къавхьухьун­ссар. ЗахIматну бур цания ца личIи бан.

2 Цими никирайн дияннин­сса кIулли вин вила ппухълуннал нясав?

-КIулли мукьра никирайн дияннинсса.

3 Инсаннал хасиятраву винна яла ккарккун къаччимур лишан?

-Щялмахъ бусаву.

4 Вила оьрмулуву яла алши бакъамур шин?

-Мукунсса шин хьусса ххай акъара.

5 Яла алши бумур шин?

-1985-ку. Му шинал на, аспирантурагу бувккуну, дурурччу­ссия докторнал диссертация.

6 ВичIара циксса арцу хьукун дигьаларгун дикIанссия вил дакI?

-Хъярчирахун бивхьуну, чIявуну кIицI дай «счастье не в деньгах, а в их количест­ве» тIисса калима. Бунияланурив тIурча, тачIавгу къаччива чIа учин арцуцIун бавхIусса талихI.

7 Инсаннал тахсирдавасса цумур тахсир хьунссия вища бигьану багъишла битан?

-КьадаршивруцIун къабав­хIусса тахсир.

8 Бувагу къабитан?

-Кьадаршиву.

9 Ссан диял къашай вил чIун?

-Ттухва нава ургансса.

10 Бартлавгун ччисса вила шанма мурад?

-ЦIуллушиву, кулпат, даву.

11 Вила оьрмулуву хъинну ххирасса кIантту бувгьу­сса шама инсаннал цIа?

-Ибрагьим, СахIибат, Ибрагьим.

12 Вина кьамулсса чув-ада­минал сурат?

-Махъ бацIан бан шайсса, чувшиву дусса, захIмат ххира­сса.

13 Винма ххуй бизайсса хъамитайпалул сурат?

-Адаминал, ласнал хъар кIи­дачIин шайсса бушиву.

14 Агарда бюхълай бивкI­ссания, инава ци кIанттай, ци чIумал увну ва ци билаятрай яхъанай ччива?

-Совет заманнайва яхъанай ччива.

15 Ссаяту бикIай вил яла хъун­­мур пахру?

-Ттула пишалухсса ччаврия ва му ххуллий хъанахъисса кка­ккиярттая.

16 Цукунсса дур вил виятурасса къарязишиву?

-Дайдирхьумур къуртал къадурнура личIан ритаву.

17 Яла ххирамур дукра?

-Кьаркь дикIухунсса лакку гьавккури.

18 Яла къаххирамур дукра?
-Дакъар мукунсса.

19 Ссаятусса бикIай вил яла хъунмур хIучI?

-Ваца балайлуву кунма: бивкIу ччива цакуну буллусса, щаву – хъун дакъасса.

20 Хьуссарив вил оьрмулуву винна инара ттинин багъишла ритан къахъанахъи­сса къел?

-Къархьуссар.

21 Лавгсса заманардавасса цIанихсса инсантуравасса цуманащал хьунаакьин ччива вин?

-Мукунсса чансса бакъар.

22 Цукунсса бур, вил пикрилий, лакрал миллатрал яла хъунмур буруккин, цукунсса бур мунил ялун бучIантIимур?

-ХIакьину хъунмур дард дархIусса духьунссар цIунилгу цIусса кIанттай миналул хъана­хъисса цIуссалакрал агьа­линацIун. Ца паракьатссагу, лавссагу оьр­му хьуну ччива гай­ннан.

23 Ци дахчилай дур хIакьину Дагъусттаннахун, цил аьнтIикIасса кIанттун ва надирсса миллатирттан лавхьхьуну, ххуйнугу, ххаллилнугу ялапар хъананшиврул?

-Щала Аьрасатнан кунма, Дагъусттаннангу лайкьну яхъананшиврул диял хъанай да­къар хIакьсса демократия, цаннал цан­нахсса ччаву.

Р. Башаев