Жула аьзизсса бавахъал бивхьусса захIматрал, дурцирив давурттал хIисав-сан дуллан бивкIукун, хьхьурду кьинирдайн кIура дарну диявав тIун бикIара.
ЧIявусса оьрчIацIун, бакIра-бакIрахсса оьл-гъаттарагу ябувну, бакI-магъ къачIалачIисса хъу-лухччигу дургьуну, ичIура марцIшивугу дуруччинсса гужгу, чIунгу ча лякъайсса диявав? Къабюхълай бурхха жущава хIакьину миннул дачIиннул дачIикссарагу давуртту дан. Ци институтру, академияртту буккирчагу, къабиял хъанай бурхха хIакьинусса ниттихъан оьрчIру тарбия бансса бюхъу. Жула бавахъул сагъну дунура, аьркинну бур жунма вайннацIа оьрчIру тарбия баврил ссихIир, усттаршиву лахьхьин.
Ва ялагу, цуксса захIматсса гьиву ларсун най бунугу, къаучинтIиссар вайннал угь-къак, къабуккантIиссар ссавурданува, дакъассар дазу-зума вайннал хъиншиврун ва чумартшиврун. Я даврил, я дардирал лахIан бан къабацIайсса, захIматрал хьхьичI ник къарищайсса жула уздансса бавахъул!
КIура-кIура баллай, вайва вай пикрирду щуруй бия ттул бакIраву Даххахъал Аминатлул юбилейрал мажлисрай щябивкIсса чIумал. Гьай-гьай, къабигьану бивкIссар Аминатлун, адаминагу ятту-гъаттаращал зунттавух уну, арулва оьрчIалсса цинмалу буллан багьсса чIумал. МяйцIалла шинал лажиндарай хьухьунссия ванил оьрмулуву байча щусса ишругу. Амма ванил бивхьусса захIматрал ахир хайрданийн дурккун дур: ванил оьрчIая яхI-къирият, ас-намус бусса, ччимур ниттил цила хьурдай учинсса оьрчIру хьуну бур. Цамуния къатIурчагума, Аминатлул тарбия увссар Щалагу Дагъусттаннан бусрав хьусса, илданул багьасса арс — Муслим Даххаев. Аминат кунмасса ниттихъайн учайхьунссар «лякьа ттеркьукьул хьуннав» куну. Бусалдаравун агьсса арснал баварахха тIий, хъисвагу пахру-ххарагу бакъар цила, ца иминну «чаний» куну бакъа инсаннахьгу зума къабахъай. Вагу духьунссар хъамитайпалул узданшиврул, къириятрал лишан.
Аминат юбилейращал барча бан, бувкIун бия бур учинсса лак, цинявппагу миллатирттал вакилтал, Муслимлул дустал ва даврил уртакьтал. Вайннавух бия Лакрал райондалул бакIчи Юсуп МахIаммадов, жяматийсса ишккакку Шяъван Оьмаров, машгьурсса журналист, «Новолакский рубеж» луттирал автор Алик АьбдулхIамидов, «Дагъусттан» ГТРК-данул хъунаманал хъиривчу Ссалам Хавчаев, Дагъусттаннал пенсионертурал Союзрал председатель АьвдурахIман Кьурбанов, шаэртал Миясат Щурпаева ва Сибирбаг Кьасумов, м.ц.
Шадлугърал мажлис цала зумувну усттарну бачин бувну ия Сапарбаг Аьбдуллаев.
Республикалул БакIчи Рамазан АьбдуллатIиповлул чулухасса «Буттал аьрщарахсса ччаврихлу тIисса ххаллилсса бахшишращал увкIун ия ДР-лул БакIчинал ва ХIукуматрал администрациялул наградартту дулайсса отделданул хъунама Артур Исрапилов.
Дагъусттаннал халкь Надир-шагьлуяр ххув хьуну 270 шин шаврин хасну итадаркьусса медаль бахшиш дунни Аминатлун Юсуп МахIаммадовлул. «Виричунал ниттиха» тIисса цила шеъригу бувккуну, Миясат Шурпаевал Аминатлун бахшиш бунни цIуну бувксса цила шеърирдал жуж.
Ссалам Хавчаев Аминатлул портретращал уккайхту, цинявппа хъатру ришлан бивкIуна.
Махъун къабагьуна мажлис бивхьусса «Олимп» ресторандалул хъунимигу — ябатIин хъанай бакъая ссурулун щавайсса авурсса тортирдая.
Ххаллилсса балайрдайну чIюлу бунни мажлис Гьажар Рамазановал, Арслан Шагьмандаровлул, Аьли Абакаровлул.
Ниттихъал хIурмат бусса цинявннал бахьлаган бунни Аминат хъункIултIутIавун.
Андриана Аьбдуллаева
