Дахьра уттигъанну кунна, на таржума дурссия Совет Союзрал КIийла Виричу АхIмад-Хан Султаннун шамилчинмур Мусил ЦIукIу булаву тIалав буллалисса чагъар-петиция чивчуну, тарихрал гъалатI тIайла бацIан буван аьркинссар тIисса макьала, Виричунал ссурахъил арснал ХIажикьурбанов Сайдуннул чирчусса. «Фейсбукрай» му макьалалул мяъна-мурадрая бусайхту, чIявусса лакгу, къалакгу, чара бакъа му иширал хъирив буккан аьркинссару тIисса комментарияртту чичлан бивкIуна.

Амма мийва гьантрай, Ххувшаврил байрандалул гьантрай, цIуницIа хьуна къахьун аьркинмур: МахIачкъалалив, Редукторный поселокрай, Вирттаврал суратру дусса баннерданий АхIмад-Хан Султаннул ца Мусил ЦIуку хъазамрайсса сурат дия. Дагъусттаннал Халкьуннал артистка Лариса ХIажиевал ва цаймигу сийлийсса инсантурал гассят социал сетирдай чивчуна му цукунчIав тикрал къахьун аьркинну бивкIсса иширая. Агьалигу, АхIмад-Хан Султаннуща кIилчинмур ЦIуку зе­къавххуну къабикIаннув тIий, аьраттал буклай бия. ДакIнийн бутанну укунмасса иш дукIугу хьуну бивкIшиву. ДукIугу баннерданий ца Мусил ЦIуку бакъа бакъасса хIисав шайхту, жулва миллатран бакъа чара бакъа­сса Лариса ХIажиевал леххаву руртун диркIшиву. Баннердал заказчиктурайри, художниктурайри тахсир тIий, шагьрулул администрациялул вакилтал лаян къабивкIуна. ДукIувамур иш дарсну хьун аьркинссия. Къавхьуну бур. БакIравунгу личIи- личIисса пикрирду бухлай бур. Жува, лакрал миллат, муданма лагма- ялттунащалгу бавкьуну, къабитайнахьгу «бити» учин бюхълай бивкIсса миллатру. ЦукунчIав кьамулнугу къабикIантIиссар жунма миллат абад бувсса Виричунай «ябацIу» буваву. ЯбацIу бакъа, цир укун­сса иширайн учинтIисса? АхIмад-Хан Султан къиримнал аьрщарал хъуна увсса арсри тIун ххираминнахьгу тIий бура: гьанна, мархри щилли, чассари? Генардал биялалия хавар буну тIий бакъарив, ххуйсса тIул дурманайнгу, къаххуйсса тIул дурманайнгу «генардал ишри» учайсса? Ахъуву дугьайсса ахънилссаннуя ихтилат багьнийгума, гьаннарай чIурчIав дуллан бикIай. Мурмурдайх къабукланну. АхIмад-Хан Султан лакрал ва къирим­нал татарнал арсри. Ярославльрай АхIмад-Хан Султаннун гьайкал тIитIайни, жучIан мунал маччахъул, къиримнал татар гъан хъанай, Виричунал буттал аьрщарайн биян хьурдай тIий буру тIий бия. АхIмад-Ханнул ссурахъу, угьарасса инсан, аьтIий, хъямала агьлай ия ттуйн цIувкIра душра учайхту. ТайнначIа Виричунал аьпалул хIурмат бюхттулну бия. Бюхттулссар жучIавагу.
Барчаллагь Лакрал театрданул артистуран, гара кьини баннерданийсса суратрай кIилчинмур Мусил ЦIуку ва орденну- медальлу дирхьусса. ЦIуницIа тикрал хьусса гъалатI тIайла бацIан бувсса. Ягу дуванну тIий дурсса оьшиврул лик­ри ххуку дурсса. Жулва яхI-намусраллив уттиния тиннайгу тачIав кьамул къадантIиссар Виричунал цIаницIун дархIусса ца баччибакъулшиву.
ПатIимат Рамазанова