Исрапиллул арс Аркаллаев Нураттин
Уттигъанну оьрмулул 84 шинаву ахиратрал хьунни ххаллилсса лаккучу, КIубурдал Аркаллаев Нураттин.
Увну ур Нураттин КIубурдал шяраву 1933 шинал июль зурул 1-нний. Шяравува байбихьулул школагу къуртал бувну, Гъумук интернатрай ивкIун ур 10 класс буккинцIа. Аьрали бурж лавхъун махъ Буйнакскалий къуртал бувну бур механикалул училище. Вания мукьах, цала оьрмулул 72 шин хьуннин, зий уссия Каспийскаллал №16-80 автоколонналий водительну, Гъумукунсса, Ваччавсса, Ккулувсса рейсовый автобусирттал шупирну.
Нураттин ия духIин дусса, ас-ламусрал виувцIусса, ка-кумаг бан чялишсса, дугърисса зунттал чув.
ЧIивину унува ппугу аьрай бат хьуну, захIматрал кьадру биялну кIул хьусса Нураттиннул цува зузисса кIанайгу ккаккан бувна цала бакIрайн ларсъсса даву лавайсса даражалий ва цIа данну дан бюхъайшиву. Ия Нураттин дакI-аьмал хъинсса, лагма-ялттунащал хIал бавкьусса, инсаншиву дусса, мунияту жяматралгу, кIулминналгу дянив хъинну хIурматрай икIайва.
Цувагу дин-чакличIа цIакьсса ия, бивкIу-буккулулссагу байссия.
Нураттин жуятува личIи шаврил хъуннасса кьурчIишиву кIидачIлай, жижара буллай буру ванал кулпатрахь, арсурваврахь, душваврахь ва цинявппагу гъан-маччанахь.
Гьав нурданул дуцIиннав, пирдавс алжан нясив баннав, махънал оьрмурдай барачат бишиннав. Амин!
КIубурдал жямат
Аьлил арс Оьмаев Аьвдурашид
ЗахIматсса азардануща ххассал уван къабювхъуну, апрель зурул 11-нний жуятува личIи хьунни жула миллатгу, Лакку билаятгу ххирасса зунтталчу, ккуличу, оьрмулухун жаваблувсса давурттай чIявучингу бусрав хьунну зий, хъунмасса кулпатрал ппушиврул ва инсаншиврул буржгу лажин кIялану биттур бувсса инсан, дакI тIайласса дус Оьмаев Аьвдурашид Аьлил арс.
Нураьлихъал Аьвдурашид увну ур 1931 шинал Ккуллал шяраву, Аьлил ва КIукIул нахIу-хIалимсса кулпатраву. Хъунмасса кулпатраву хъун хьусса Аьвдурашид чIивинияцIа захIмат буллан ххира хьусса ия.
Буттал шяраву 7 классгу бувккуну, ЧIяйннал дянивмур даражалул школданий 8 классгу къуртал бувну, 9-мур классраву дуклай уна, цаярва оьрмулул хъунисса жагьилтуравух аьралуннаву къуллугъ буллан увцуссия (цукун дагьссияв, оьрмулул шинну хъунину дагьну).
Къуллугъ бувну увкIун махъ, цIунилгу школалий дуклай, 10 класс къуртал бувссия.
Зий уссия личIи-личIисса къуллугъирттай: комсомолнал райкомрал отделданул хъунаману, республикалий ца яла хъуннамунин ккаллисса Ккуллал колхозрал парткомрал секретарьну, райондалул спортрал комитетрал председательну, партиялул райкомрал отделданул хъунаману.
Чу, ци къуллугърай цува зурчагу, Аьвдурашидлул дакIнийхтуну, марцIну щаллу байссия цайвасса буржру. ЦукунчIав къаххирассия цукун-дунугу даву дуллалаву, баччибакъулшиву. Чялишну гьуртту шайссия райондалул цинявппагу иширттавух. Ва цувагу, хаин къавхьусса, марцIсса коммунистъя. Аьвдурашидлун хъинну ххирассия, эшкьи-ччаву дурну бувцусса, шяравугу авуршиврий цIа дурксса цала кулпат Сиясат. Цала оьрмулул дус ччяни яла лагавугу бухIан къахъанай, кьуркьу уллай икIайва. Ванийну ялун дирхьунссия захIматсса азаргума.
ЧIявучин эбратранну хъуни бувуна вайннал цала кIия арс ва кIива душ. Ххари увссар Аьвдурашид вайннал оьрчIал ва оьрчIал оьрчIалгу.
Аьвдурашидлул хIалал дурссар тамансса бахшишру, хIурматрал грамотартту. Ва ия дяъвилул ва захIматрал ветеран. Яла хъунмур бахшишнугу ккалли дайва цува чIявучин хьхьичI лажин кIялану, гъан-маччанан, дус-гьалмахтуран бусравну ушаву.
Аьвдурашид ахиратрал шаврил хъуннасса кьурчIишивугу кIидачIлай, жижара буллай буру ванал уссихь, ссихь, арсурваврахь, душваврахь, минная бивзминнахь, куявтурахь, циняв гъан-маччаминнахь. Аьвдурашидлул чаннасса сиппат абадлий хъамакъадитантIиссар.
Алжан нясив баннав, рухI хъинний дишиннав. Амин!
Аьвдурашидлул чIявусса
дустурал цIания
Гьарун ХIасанов
