АпатIрахьхьун багьсса инсантурал чIарав бацIияра!

Май зурул ряххунний, дя-дяхтта, цIу дагьну, ччурччунни Лакрал райондалийсса Карашрал шяравусса къатри.

Ва иширал хъунмур захIмат­шивугу ссаву дур учирча, му дур кIай къатри совет заманнайра, ва ца общежитиялун кунна, дурну диркIсса душивруву. КIиву яхъанай буссия арулва-мяйва кулпат.
ЦичIав бан къавхьуну, ччувччунни цалархIал щалва корпус. Гъумучату Карашав бияннинсса ххуллул манзилгу бигьасса бакъашиврийн бувну, цIу лещан дай машинартту бияннин сайки хьун бумур хьуну бия. ТIайлассар, бивну махъ пожарниктурал цащава шаймургу, ца ххишалагу буллай бия. Амма миккугу ялун личлай дия ца цамургу захIматшиву – машиналувусса щин духларгукун, га кIилчин буцIинсса щинал хъирив Хъуннеххайн занан багьлай бушиву. Цила багьайкунсса тIалавшиндарайн бувну, гьарца шяраву бикIан аьркинссар тIар, муку-мукунсса апатIру хьукун, ишла бавансса щинал хIавзру. Амма ми чув буссар, та бивкIссар?
ХIасил, бивунни инсантуран хъинну хъунисса зараллу, кIай къатраву яхъанай бивкIсса чIявуми ливчIунни так цайнна лархсса янна-калуву.
Лабизлай буру цинявннайнмагу, бувара зущава шайсса ка-кумаг, апатIрахьхьун багьсса инсантурал чIарав бацIияра, цуманаща ци журалий бювхъурив, мукун.
Укунсса чIумаллихха чири тIисса мукъул мяънагу, мурадгу Ялувсса ЗанначIан биянну гьаз шайссагу.

Р. Башаев