Гьуйннал Гъази-МахIаммад-Апаннинал цIа чIирину-хъунну Лакку кIанттулгу, Дагъусттанналгу тарихраву чирчусса цIа дур. Махъ бакъа, му ивкIун ур хъуннасса кашилул заллу – диндалувугу, оьрмулувугу. Мунал биография бур ца кьисса чичинуксса.

ЧIавану унува къуртал бувну бур Ярагълив щайх МахIаммад-Ярагъинал мадраса. Цанма бувцуну бур щайхнал Зайнаб тIисса шамилчинмур душгу. Мунащал архIал Гьуй бувкIун махъ Зайнаб микку жяматран уква Кьуран лахьхьин буллай бикIайсса бивкIун бур.
МахIаммад-Апанни гьуртту хьуну ур оьруснал паччахIнал аьра­луннайн къаршисса цалчинма-цалчинсса гъазаватирттавух. Къуллугъ буллай ивкIун ур ШамиллучIа найпну. Талайгу ивкIун ур, дяъви байгу-бивхьуну, байлитIунцIа, Шамил ясирну увгьусса кьинилийн ияннин. Цуксса тIайлассарив къакIулли, халкьуннаву бикIай хаварду, имам ясирну лагаву бухIан къахъанай, му хъунмасса хIаллай къашавай хьунугума ивкIссар тIисса. ИвкIуну ур Гъази-МахIаммад-Апанни 1867-кусса шинал цала буттал шяраву – Гьуй! Увччунугу ур Гьуйннал Хъун хIатталлив. Мунал гьаттай, щайх-мубарак хIисаврай, та чIумалва жяматрал бацIан бувну бур цIувцIучария бувсса исвагьи­сса зиярат къатта. ТIайлассар, махъсса чIумал, вив щин дуклай дур тIий, ялув­сса къуппа муххал бавкьуну бур. Гьай-гьай, цIувцIучарилмур чIалачIин цимилгу ххуйссия.
Гьуйннал жяматралгу, лакралгу цIанихсса арс, диндалулгу, дяъвилулгу ццах бакъасса аьс­кар, Заннал лагъ ва гьаттаву паракьат увну гьашину там хъанай дур 150 шин.
Жул корр.