Тамансса хъуни-хъунисса ва мюнпат бусса проект­ру чулийн дуккан дунни «Гъази-Гъумучи» фондрал зий байбивхьуния шинмай. Дайдирхьунни ца цIусса проект ттигу щурущи дуллай.Му дур «Ттул Лакку кIану 2017» тIисса Лакку улклул суратирттал конкурс. Мунил мурад бур Лакку улклул аьнтIикIасса кIанттурдал суратирттал архив батIинсса, гихунмай, ми суратирттал кумаграйну ми кIанттурдая буслай, туристътал кIункIу бансса. МуницIун кабакьин хIадурну бур ДР-лул Культуралул ва Печатьрал министерствардугу.

Зулайхат Тахакьаева
Конкурсран хас дурсса пресс-конференция хьунни вай гьант­рай МахIачкъалалив «Гранд-плаза» комплексрай. Муний гьуртту хьунни ДР-лул Халкьуннал Мажлисрал депутат, фондрал ца хьхьичIунсса уртакь Амирхан Амирханов, ДР-лул культуралул министрнал хъиривчу Мурад ХIажиев, «Гъази-Гъумучи» фонд_рал директор Аьвдуллагь Аьли­ев, художниктал ХIабибуллагь ХIабибуллаев, Амир Амиров ва журналистал.
Амирхан Амирхановлул бувсунни мукьра шинал дянив «Гъази-Гъумучи» фондрал бакIуйн дуккан дурсса проектирдая, ихIсандалул давурттая. Республикалул иш бачиншиврул, хIакьину Дагъусттаннал БакIчинал къулагъасралу­сса масъала туризм хьхьичIуннай даву бушиврий чIурчIав дуллай, кIицI лавгунни «Ттул Лакку кIану» проектгу му ишираву бучIину лякъинтIишиву.
Мурад ХIажиевлул кIицI лавгунни, Дагъусттан аьнтIикIасса кIанттурдал, караматсса тIа­биаьтрал, ляличIисса архитектуралул ва тарихрал гьайкаллал авадансса билаят бухьурчагу, миннуя халкьуннан чанну кIулну бушиву. «Дагъусттаннал Культуралул министерствалул ччянияцIавасса хиялли, Дагъусттаннал ябацIансса кIанттурдал суратру цачIун дар­тIун, альманах итабакьинсса. Амма мукунсса каши жучIа да­къая, ми суратру цирда канилу дакъашиврийн бувну. Гьай-гьай, дур караматсса суратру Камил Чутуевлул ва ХIажимурад Зургаловлул архивирттаву. Амма ми дур хьхьичIарасса, пленкалия цифровойсса журалийн дуцин къабюхъайсса. ХIакьину интернетрай ца-цал итталун дагьай ттинин ххал къавхьусса караматсса кIанттурдал суратру, амма мигу дур мобил телефоннайн ларсун, чIалачIин аьч дакъасса. Мунияту жу хъинчулий ккаклай буру «Гъази-Гъумучи» фондрал сипта. Культуралул министерствалул пик­ри буссар, ва конкурсрай язи дургьуми суратру цачIун дурну, «Ттул Лакку кIану» тIисса суратирттал альманах итабакьинсса.
Балжину конкурсрал шартIир­дая бувсунни проектрал каялувчи Рашид Сулаймановлул.
Конкурсрайнсса давуртту кьамул дуллай байбивхьуну бур апрель зурул 1-нний ва къуртал хьунтIий бур сентябрь зурул 1-нний. Гихунмай зурул лажиндарай ххал дигьлантIий бур ми давуртту. Ххув хьуминнан бахшишру дуллалисса шадлугъ хьунтIий дур октябрь ягу ноябрь зуруй. Гихуннай дан дакIний бур язи-язими суратирттал выставка, цал — МахIачкъалалив, яла — Москавлив.
Конкурсрай гьуртту хьун бюхъантIиссар оьрмулул 18 шин бартларгсса инсантураща.
Конкурсрал дур мукьра агьам­сса номинация: «Лакку улклул тарих» (Лаккуйсса тарихрал ва архитектуралул гьайкаллал суратру), «Лакку улклул сипатру» (инсантурал суратру), «Лакку улклул тIабиаьт», «Лакрал магьирлугъ ва багьу-бизу» (лакрал аьдатсса сянатирттацIун дархIусса сурат­ру). ДикIантIий дур ялагу кIира номинация: 18 шин бартлаган дурасса чIава суратрищултрал давурттал ва мобил телефондалийн рирщусса суратирттал.
Суратру кьамул дуллай бур так цифрардал журалий, бучIину бур хьхьичIра рирщусса суратругу тIайла дуккан, так ми дикIан багьлай бур цифрардал журалийн дурцусса.
Конкурсрал жюрилуву би­кIан­тIий бур республикалул хьхьи­чIунсса художниктал ва суратрищулт.
Гьануми номинациярттал бахшишру дикIантIий дур укунсса: цалчинмур кIану – 50 азарда къуруш; кIилчинмур кIану – 20 азарда къуруш; шамилчинмур кIану – 10 азарда къуруш.
ЧIава суратрищултрал ва мобил телефондалийн рирщусса суратирттал номинациярттай ххув хьуманан – ххю-ххюазарда къуруш.
Конкурсрая балжину кIул бан бюхъайссар ва сайтрай: www. MyLakia.ru
Конкурсрай гьуртту хьун ччиминнал аьрзри ва давуртту кьамул дуллалиссар ва адресрай: MyLakia@fondgazikumuh.ru