Апрельданул 22-нний ДР-лул БакIчи Рамазан АьбдуллатIипов гьуртту хьунни Татарсттаннал Халкьуннал 3-мур съездрай.
Къазаннай хьусса «Миллатирттал цашиврувур Аьрасатнал кьуват» тIисса форумрай ххал бигьлай бия миллатирттал культуралул, граждан обществалул институтру (идарартту) паччахIлугърал властьрал ва кIанттул цилакаялувшиврул органнащал уртакьну зузаврил хIакъиравусса масъалартту, миллатирттал политикалул гьанурду ялунгу ххуй бансса чаранну лякъаву. Съездрай гьуртту хьунни 730 инсан.
БавтIминнал хьхьичI махъ лахълай, Татарсттан Республикалул цалчинма Президент, ТР-лул ПаччахIлугърал советник Ментимир Шаймиевлул увкунни: «На ххарину ура хIакьину шиккун чIявумиллатру бусса Татарсттаннал ккуран сакин давриву гьуртту хъанай бивкIми бучIаврия, Татарсттаннал халкьуннал Цалчинмур съездрай гьуртту хьуми цIанакулгу ххал шаврия».
АьФ-лул Президентнал Администрациялул Каялувчинал хъиривчу МахIаммадссалам МахIаммадовлул дурккунни Аьрасатнал Президент Владимир Путиннул Татарсттаннал 3-мур Съездрай гьуртту хъанахъиминнахь ва хъамаллурахь аьла-ссалам буллалисса адрес.
«ХIурмат бусса дустал! Ттул пикрилий, зул форум хъанахъиссар республикалунгу, аьмну Аьрасатнангу хъуннасса мяъна дусса ишну. Татарсттан машгьурну бур цила аьвзалзаманнул тарихрайну ва микку ялапар хъанахъисса миллатирттал культуралийну ва аьдатирттайну», — тIий бур адресрай.
Дагъусттаннал БакIчи Рамазан АьбдуллатIиповлул бавтIминнахь барча увкунни съезд тIитIаву. Ганал кIицI дунни Татарсттаннал миллатирттал Ассамблеялул Советрал давурттаву хьун дурсса хьхьичIуннайшивуртту. «На шиккун увкIссияв ванияр 10 шинал хьхьичI. Зу чIалачIи бунни зува увкусса махъ бацIан байсса, яхI-намусрал инсантал бушиву, тIайламур ххуллийх, дусшиврул, уссушиврул ххуллийх най бушиву. Мунийн бувнур зу зулла республикалий, зулла ватандалий дузалшинна дуллалисса», — увкунни Рамазан АьбдуллатIиповлул.
Съездрай хъунмур махъ лавхъунни Татарсттан Республикалул Президент Рустам Миннихановлул. Ганал бусаврийн бувну, региондалий цIанасса ппурттувусса хьхьичIуннайшивуртту шаврил сававру хъанай дур маэшатлугъ (экономика) лядуккаву, жяматийсса ва политикалул тагьар цалий дацIаву, миллатирттал ва диннал дянив дакьаву цIакь шаву.
— Дузалшинна шавриву хъунмур кIану бугьлагьиссар жулва миллатирттал ванияр хьхьичIми съездирттай кьамул бувсса хIукмурдал ва ми дузрайн буккан баврил.
Ттизаманнул Татарсттан бур АьФ-лул регионнащалгу, чIявуми кьатIаллил билаятирттащалгу хIала-гьурттуну зун хIадурсса регион», — увкунни Рустам Миннихановлул.
ХIадур бувссар ХI. Аьдиловлул
