Каспийскалий «Аьрасатнал ниттихъул» тIисса жяматийсса суккушиндарал региондалулмур отделениялул сипталийну тIивтIусса, Аьрасатнал Виричу МахIаммад НурбахIандовлул цIа дирзсса, «Отечество» тIисса клубрал ирглийсса батIаву хьунни. Мунивух гьуртту хьунни шагьрулул школарттал дуклаки оьрчIру, цалгу вирттаврал цIарду ларсун нанисса: «гаджиевцы», «омаровцы», «назаровцы», «аметхановцы», «эмировцы». Мукунма Аьрасатнал вирттаврал-пограничниктурал цIа дирзсса 9-мур школалул ва 1-мур школалул дуклаки оьрчIру, «Жагьилсса гвардия» тIисса жяматийсса сакиншиндарал члентал.
Бадрижамал Аьлиева
Клубрал давривух гьуртту хьунни Аьрасатнал Виричунал ппу НурбахIанд НурбахIандов, шагьрулул администрациялул аппаратрал каялувчи Лина ХIасанбекова, Аьрасатнал УМВД-лул Ярославуллал областьрайсса полициялул кьюкьлул командир Андрей Бурутин, Каспийскаллал шагьрулул Ветерантурал советрал председатель Тажуттин ЧIимаев, шагьрулул музейрал директор Нажмуттин ХIажикьурбанов ва чIявусса цаймигу бусравсса хъамал.
БатIаврий хьхьичIмукъун кIанайсса ихтилат бунни «Аьрасатнал ниттихъул» суккушиндарал региондалул отделениялул хъунмур Таиса МахIаммадовал.
Аьрасатнал Виричу МахIаммад НурбахIандовлул буттал чIа увкунни дуклаки оьрчIан дуккавриву тIайлабацIу, паракьатсса ссавнил лув, цала нитти-буттал чIаравсса талихIрайсса оьрму.
БатIаву дачин дурсса Мадина Темировал оьрчIахь бувсуна ца цамагу дагъусттанлувнал виричушиврия – Росгвардиялул 102-мур бригадалуву къуллугъ буллалисса аьраличу, хъунама лейтенант Аьбдулла Кьурбановлул, МахIарамккантуллал райондалий бандгруппардащал талай, цалва аьрали бигар биттур буллай, жан дуллуну дур. Аьрасатнал Президентнал 2016 шинал декабрьданул 28-нний бувсса ХIукмулийн бувну мунан «Чувшиврул» орден дуллуну дур (ивкIуну махъ). Му дуклай ивкIсса Дахадаевуллал райондалийсса Кудагиннал школалун мунал цIагу дирзун дур. Махъ лавхъуна му райондалул бакIчи Жаруллагь Оьмаровлулгу. Мунал ихтилат вибувцIуну бия дагъусттанлувтал цала гъан-маччаминнацIа, цанма ххираминнацIа хъанай бушивруцIун дархIусса къювулул.
Махъру лавхъуна махъсса хъамаллуралгу.
