Уттигъанну дунияллийн бувккунни ттинингу жунма чIявучин кIулсса, кьамулсса автор, филологиялул элмурдал кандидат, ДГТУ-рал кьатIаллил мазурдил кафедралул хъунмур Жанна Абуевал « ЦичIав тIабиаьтраву къанахIакьданссар» тIисса шеърирдал жуж.

Луттиравун бавтIун бур оьрмулиясса, инсаннал кьадарданиясса, личIи-личIисса мяъна-мурадирал шеърирду. ХIасил, авторнал дунияллухсса ябитаврил асардал жуж учин бучIир ванийн. Луттирал цIаниха лавхьхьуну, цуппа лугу буккун тIааьн бизанну сакин бувсса бур, мужаллатгу дур тIабиьтрал рангру ишла дурсса.
ТIалав бувара, буккира, кьимат бищара!

* * *
Цаппара чIумул хьхьичI бувккунни жуна чIявучин кIулсса, ЧIарттал шяраватусса, ДАССР-данул лайкь хьусса учитель Мухтар МахIаммадовлул сакин бувсса, цала буттал шяраваллил тарихран хас бувсса «ЧIарттал щарнил ттуршукурдал мархри ва хIакьинусса кьини» тIисса, канил бугьангу тIааьнсса, хъунмасса лу. Луттирал цалчинмур чIапIи рутайхтува, чIалай бур авторнал бивхьусса хъунмасса захIмат. Ванивун, щарнил лавгмуния тIайла хьуну, хIакьинусса щарнил ккаккиярттайн бияннин бувсун бур. Бувсун бур жяматрал дянива бувксса, хьхьичIун ливчусса халкьунная, щарнил тарихрайн багьайсса чIявусса иширттая. Хъунмасса бутIа хас бувну бур Буттал кIанттул цIанийсса дяъвилул чIумун. Луттираву бусласимунил дя-дяних шяраву хъанахъисса иширттаясса суратругу дирчуну, лу буккун гъира бутанну сакин бувну бур.
Хъунмасса барчаллагь тIий ур автор лу сакин бан цацIунма кабавкьусса щарнил дянивасса агьулданийнгу. Луттирал тираж дур 500 экз.

З. АьбдурахIманова