Хъунна хъанай дур аьрали хъаннил аьдад
Японнал мюхчаншиврул министр Томоми Инадлул баян бунни аьрали къуллугъ бартбигьлан армиялийн буцлаци­сса хъаннил аьдад хъун дуллалишиву ва уттиния тинмай разведкалул бутIравун ва танкардал аьралуннавунгу хъами буцлантIишиву.ХIакьинусса хIасиллайн бувну, цIанакул армиялий бусса бур 14 азарва хъамитайпа.

Машинарттал200 миллион
Китайнаву сияхIрайн лавсъсса автомобильлал аьдад 200 миллиондалийн лархъун ду­сса дур. Мотоциклетругу хIисав дурну, 364 миллион агьалинахь му транспорт дусса дур. Так 2017 шинал цалчинмур кварталданий сияхIрайн лавсун бур 8,2 миллион цIусса транспортрал.
Бала-хатIасса байран
Аьдатравун дагьсса байран дур Мьянмалийсса щинал фестиваль. Бирманал календарьданийн бувну, му билаятрал яла хъунмур байран хъанай дусса дур, агьали шанна-мукьра кьини кувннайн кув щинну рутIлай, цIусса шин дучIаврил савлугъ дуллалаву. Укунсса байранну сийлий дур чIаххуврайсса билаятирттайгу: Таиландрай, Камбоджалий ва Лаосрай. Гьашинусса фестивальданул гьантрай, 13-16 апрельданий, сайки 300 инсан ивкIуну ур, чIявусса бусса бур щавурду дирсса ва цIунцIияртту хьу­сса. Гьаннайсса, байрандалул гьантрай агьалинал оьхIалсса тIулдакъашивуртту ва гъургъазарду дурну дур.
Махъра-махъсса ххувшаврил байран
Украиннал баян бунни гьашину махъра-махъсса Ххувшаврил байран дувантIишиву, яла Верховная Радалул 9 майрал кьини бигьалагай кьини къадикIантIишиву цIакь дуллалисса закон кьамул дуван­тIишиву. ЦIусса закондалийн бувну, 9 майрал кьини ва 8 мартрал кьини байран кьинирдуну личIан тIий дур: 9 май – КIилчинмур дунияллул дяъвилий нацизмалияр ххув хьусса кьинину, 8 март – Хъаннил ихтиярдал кьинину. Амма ми бигьалагай кьинирду къадикIан тIий дур.
ЦIунилгу латIин алфавит
Утти Къиргъизнавугу маслихIат буллай бусса бур кириллицалия латин алфавит­райн бучIан. Къазахъисттаннал лидер Нурсултан Назарбаевлулгу апрель зурул 12-нний хIукуматрайн тапшур бунни миллатрал алфавит латиницалийн буцавриха зун ва 2025 шиналнин циняв документру латиницалийн бувцуну къуртал бан.
ХIадур бувссар
П. Рамазановал