Итни кьини ШавкIуллал шяраву хьунни райондалул терроризмалийн къаршисса комиссиялул батIаву. Муний гьуртту хьунни Лакрал райондалул бакIчинал хъиривчу, терроризмалийн къаршисса комиссиялул секретарь Амсар Къажлаев; райондалул администрациялул отделлал ва идарарттал каялувчитал; ШавкIуллал ва Щардал шяраваллал администрациярттал бакIчитал; вай кIирагу шяраваллил школарттал директортал; ШавкIуллал шяраваллил агьлу ва диндалул ишккаккулт.
Амсар Къажлаевлул бувсунни терроризмалийн ва экстремизмалийн къаршину райондалий дуллалисса даврия. ЧIурчIав дуруна терроризмалул ва экстремизмалул идеологиялийн къаршину 2013 – 2018 шиннадий райондалий дан ккаккан дурсса давуртту чялиш дан багьлай бушиврий, му ишираву кIанттул цилакаялувшиннарал органну зун багьлай бушиврий жяматращал цачIуну, гужлан дан багьлай бушиврий дазул кьатIув ялапаргу хъанай, террористический организациярттал сияхIрай бушиврий щак бусса инсантурал гъан-маччаминнащалсса профилактикалул даву, ми терроризмалул пикрирдая ябуцан бувну, шаппай кIура баян бансса мурадрай.
Терроризмалул идеологиялийн къаршисса даву кIулшиву дулаврил ва спортрал идарарттай ци даражалий дуссарив бувсуна райондалул кIулшиву дулаврил управлениялул каялувчи Явсупи ХIамзаевлул ва спорткомитетрал хьхьичIунсса пишакар Малик ХIусмановлул.
Майрал байраннай жяматрал мюхчаншиву дуруччинсса чаранная бувсуна Амсар Къажлаевлул.
Терроризмалул ва экстремизмалул идеологиялийн къаршину цала шяраваллаву цукунсса давуртту дуллай буссарив бувсуна ШавкIуллал ва Щардал шяраваллал бакIчитурал Рамазан Асабовлул ва Мирослав Ибрагьимовлул.
Терроризмалул идеологиялул биялалухьхьун биривсса ва терроизмалул хасиятрал тIулдакъашивуртту даврихлу танмихI лавхъсса инсантуращал социал сетирдаву ци журалул даву дуллай буссарив бувсуна райондалул администрациялул информациялул ва аналитикалул центрданул каялувчи ТIагьир АхIмадовлул.

Зулайхат Тахакьаева