Апрель зурул 21-нний ЦIуссалакрал райондалул бакIчи ХIажи Айдиев хьунаавкьунни туркнава бувкIсса инвестортуращал. Туркнавасса инвестротурал делегациялул мурад бия ЦIуссалакрал райондалийсса инвестициярдал хIалкьазиялул хъирив лавну, хIала-гьурттуну зунсса инвестициярдал проектру дурну, шиккусса аьрщарай цаппарасса теплицарду бувансса.
ДакIнийн бутанну, ЦIуссалакрал райондалул бакIчи ХIажи Айдиев, ДР-лул Халкьуннал мажлисрал депутат Амирхан Амирханов бакIчисса агьамсса делегация хьхьичIвагу лавгун бивкIшиву Туркнал вакилтуращал хIала-гьурттушиврий зунсса инвестициярдал проектру сакин дан.
Тукнавасса инвестортал: Сонер Саримаден, Санджар Эрдоган, Эроглу Али Илсин, Тугтекин Бурхан ва цаймигу бусравсса хъамал цала кабинетраву кьамул бунни ЦIуссалакрал райондалул администрациялул бакIчи ХIажи Айдиевлул. Ва хьунабакьаврий мукунма гьуртту хьунни ЦIуссаккуллал шяраваллил бакIчи Абакар Къапланов, ишбажаранчи Абумуслим ХIасан-хIусайнов.
Хъамаллурал бувсунни цивппа ххал дуллай бивкIшиву ЦIуминалийсса ЦIуссалакрал предприятиярду, парникру ва цаппарасса аьрщив. Ми ххал дурну махъ, хIукму бувну бур уртакьну зунсса ивестициярдал проектирдаха зун.
Санджар Эрдоганнул кIицI лавгунни, теплицардаву ва парникирдаву хъунмурчIин ххяххан буллай бушиву нисварти, помидорду ва уттиния тихунмай бувантIими парникирттаву цаймигу ахънилсри ххяххан дуллансса шартIру дузал дуллай бушиву.
— ЦIуссалакрал райондалул агьали дахьва дахьва байбивхьуну бур теплицардаву ахънилсри ххяхххан дуллалисса даву нирххиравун рутлай. ЦIу-цIусса техногояртту ишла дуллай, парникирттал даву чялиш дуккан даврийну, хъунмасса мюнпат хьунтIиссар райондалул экономика ва хозяйства хьхьичIуннай даврийн. Инвестициярдал проектру зузи даву мурадрай, ххал дигьарду жу дянивмур Азиянал билаятрайсса аьрщи. Миннах бурувгун, инвестициярдал проектру мюнпатну ишла дансса хъуннасса сант дур Дагъусттаннал аьрщарай,- увкуна Санджар Эрдоганнул.
Вай проектру дузрайн дуккан дуван бюхъарчан, республикалий 2000 ливчусса инсантурансса зузи кIантту хIасул хьун най бур. Проектру зузи дурну, миннул ишру ххуйну бачирчан зузи кIантту кIилийну гьарза хьун тIий бур.
Райондалул бакIчи ХIажи Айдиевлул бувсунни шикку кIицI ларгсса проектирдал чIарав бацIаву дуллалишиву ДР-лул ХIукуматрал даражалийгу.
Мукунма ванал бувсунни, инвестициярдал проектру дузрайн дуккан даву мурадрай, аьркинссаксса аьрщи итадакьин хIадурну ушиву.
Туркнавусса хъунмур фирмалул хIала-гьурттушиврийсса кьутIи кьамул дурну, 50 гектар аьрщарал 5 шинай зузи дувансса бизнесрал план сакин даннин сайки ца барз хьун тIий бур.
КьутIирду чирчун махъ райондалул бакIчинал хъамаллуран ккаккан дунни арендалий зузи дувантIисса аьрщи. Мукунма инвестортуран ккаккан бунни ЦIуссаккуллал шяравусса «Агро-АС» ООО теплица. Хъамллурал ххал диргьунни нисварти ва помидорду бугьаврил ва ххяххан баврил кьяйдарду.
И. Саидова.
