Итникьини МахIачкъала шагьрулул 81-мур оьрчIал багъраву байбивхьунни щалагу Аьрасатнал конкурс «Шинал тарбиячи – 2017».
Зулайхат Тахакьаева
Конкурсрай гьуртту хьун бувкIун бур республикалул районнал ва шагьрурдал муниципал конкурсрай ххув хьусса, школалийн гьаннинсса кIулшиву дулайсса 33 тарбиячи.
Конкурс тIитIлатIисса шадлугърай гьуртту хьунни ДР-лул КIулшиву дулаврил ва элмулул министерствалул аьмсса кIулшиву дулаврил управлениялул консультант Ххадижат Аьлиева, МахIачкъала шагьрулул кIулшиву дулаврил управлениялул каялувчи ТIагьир Мансуров, ванал хъиривчу Эльмира Рамазанова, кIулшиву дулаврил идарарттал каялувчитал ва пишакартал.
Конкурсрай гьуртту хъанахъиминнан тIайлабацIу чIа тIисса ихтилат бувна 81-мур оьрчIал багърал каялувчи Белла Багъдуевал.
ТIагьир Мансуровлул кIицI лавгуна ва конкурсрал кабакьу буллалишиву школалийн гьаннинсса кIулшиву дулаврил аралуву зузисса тарбиячитурал пишакаршиву ларай дан.
Конкурсрал жюрилуву бур ДР-лул КIулшиву дулаврил ва элмулул министерствалул, профсоюзрал, КIулшиву магьир даврил институтрал, Тахо-Годил цIанийсса элму ахттар даврил институтрал зузалт, республикалул педагогикалул вузирдал ва колледжирттал дарс дихьулт.
Конкурс бур шанна турданийсса. Цалчинмур турданий тарбиячитал буслай бия цаятува, цалла даврия. КIилчинмур турданий тарбиячитурал дирхьунни дарс. КIира турданул хIасиллайн бувну, финалданийн увккунни 10 тарбиячи. Вайннава ххув хьума личIи ан тIий ур «Усттаршиврул ихтилат» тIисса темалун хас бувсса лекциярдал хIасиллайн бувну. Ххув хьуминнан бахшишру дуллалисса шадлугъ хьунтIиссар хIакьину.
