Апрель зурул 19-нний МахIачкъалаллал аэропортрай бунни дуклаки оьрчIансса экскурсия. Каспийскаллал 2-мур школалул дуклаки оьрчIан Дагъусттаннал аэропорт цукун зий буссарив ккаккан бувансса сипталий бувккунни ва школалул 3-мур классрал каялувчи Земфира ЖахIпарханова.
Дуклаки оьрчIан ккаккан дунни аэропортрай самолетру леххайсса ва ликкайсса куц, пожар бригада зузисса куц. ОьрчIан яла-яла асар хьунни, ТУ-154 самолетравун бувххун, пилотнал штурвалданух щябикIаву.
Хъирив оьрчIан ккаккан бунни Совет Союзрал кIийла Виричу АхIмадхан Султаннул цIанийсса аэропортрал аэровокзал. ОьрчIахь гьарта-гьарзану бувсунни Виричунал оьрмулия ва мунал дурсса къучагъшивурттая. Дуклаки оьрчIащалсса экскурсия бунни чIярусса шиннардий шикку зузисса, цIанакулгу аэропортрал профсоюзирттал комитетрал каялувчишиву дуллалисса, Мансур Къимпаевлул.
Шиккува кIицI лаган, махъсса ппурттуву агьалинан Дагъусттаннал аэропорт ккаккан буллалисса экскурсиярду ччя-ччяни буллай бур.
ХIакьину МахIачкъалаллал аэропортрая ссятрал мутталий лехлай ур 200 пассажир, дунияллул кьатIувсса рейсирдайнгу ссятрал мутталий лехлай ур 60 инсан.
2016 шинал февраль зуруй аэропортрай буллай байбивхьуну бур 8000 кв. метра дусса, 190 пассажир ссятрал мутталий итаакьин бюхъайсса цIусса терминал.
Мукунма, хьхьичIунсса авиакомпаниярттащалсса хIала-гьурттушиврийн бувну, гьарза хъанай дур МахIачкъалалия цайми шагьрурдайнсса рейсру.
МахIачкъалаллал аэропортрая гьарца кьини Москавлийн лехлай дуссар ацIунничIан дирсса самолетру. Дуссар Санк-Петербурглив, Сургутлив, Къазахъисттаннайн, Туркнавунсса рейсругу.
Май зурул 23-нний МахIачкъалаллал аэропортрай дайдишинтIиссар Ростоврайн, Сочилийн ва Минводылийнсса рейсругу.

И. Саидова