Бувгьунни 500 ттарлил мурхь

Лакрал райондалий хьунни Экологиялул шинан хас дурсса хъуннасса ва хъамакъаритансса акция. Мунивух гьуртту хьун увкIун ия виваллил иширттал министргу.

АлхIаткьини Гъумучиял Хъун клубраву хьунни Лакрал райондалий Экологиялул шин тIитIлатIисса шадлугъ. Муний гьуртту хьунни ДР-лул виваллил иширттал министр Аьбдурашид МахIаммадов, экологиялул ва тIабиаьтрал сурсатирттал министрнал хъиривчу Аьли АхIмадов, Гъуниннал вацIлул хозяйствалул каялувчи Исмяил Исмяилов, «Илчи» кказитрал хъунама редактор Руслан Башаев ва чIявусса цаймигу.

https://youtu.be/wg41PcELlkA

Шадлугъ дайдихьлай, райондалул бакIчи Юсуп МахIаммадовлул увкуна:
— Инсаният, цалнияр цал хьхьичIуннай хъанай, мютIи дуллай дур цийнна аьрщи-ссав, аьлам. Амма инсаннал хъуни-хъунисса хьхьичIуннайшивурттал къинттуллух бур бунияласса буруккинттугу, миннувагу яла агьамми бур тIабиаьтрайн багьайсса.
ТIабиаьтрал кризис асар хьунни дунияллул цумурцагу билаятран ва халкьуннан. Жунма гьарцаннангу багьлай бур жула аьрщи дуруччинсса чаранну ляхълан. Райондалул администрациялул хIукмулийн бувну, салкьи бувну буссар Экологиялул шинан хас дурсса давуртту дувансса сакиншиндарал комитет. Леххаву рутансса тагьарданий бур ччюрк дичлачисса кIанттурду. Агьалинал экьидичлачисса ччюрк хъунмурчIин зизлай дур неххавун. Шяраваллал бакIчитуран аьркинну бур ччюрк дичайсса кIанттурду неххамачIурдичIату арх буван. Ппухълуннал жунна кьариртсса куццуй марцIну ядан буржлувссару жувагу жула шяраваллурду, зунттурду, хъуру, нехру, щаращив».
Аьвдурашид МахIаммадовлул кIицI лавгуна Дагъусттаннай сакин дурну душиву акция «Ххувшаврил мурхьру» тIисса, къуллугърал бурж биттур буллай оьрмурдацIа хьусса низам дуруччай органнал зузалтрал аьпалун.
— Ва акция хьуссар лув-ялув ххюра шинал, Ххувшаврил байрандалул хьунийн. Гьуртту хъанай буссар мунивух виваллил иширттал органнал зузалтгу. Лакрал райондалий цалчин ва акция дурссия Ххувшаврил 70 шин шаврил юбилейран хасну ва муния шиннай аьдатравун дагьссар, Лакрал ва Ккуллал районнал виваллил иширттал отделданул зузалтрал гьурттушиндарайну гьашину шамилчин бувгьу­ссар къуллугърал бурж биттур буллай ливтIусса полицанал зузалтрал аьпа­лун цIа увкусса ттарлил мурхьру ВацIилу зунттуй, — увкуна Аьвдурашид МахIаммадовлул.
Руслан Башаев:
— Чув бухьурчагу, мурхьру бугьаврил хIакъиравусса ихтилат су­кку хьутари, ттун мудан дакIнийн багьай укунсса зад. Зун хъамакъабивтхьурча, ванияр ацIния кIира-шанна шинал хьхьичI, Надир Хачилаевлул сипталийн бувну, Лакку Билаятрай вана укуннасса интнил кьинирдай бувгьуссия азарвахъул мурхьру. Му даву сукку дуван Надир хъит учин увсса сававнугу хьуну бия укунсса иш. Щамххаллал чIаравсса дуснакьрай унува, цува усса камералул чIивисса чIавахьулттивух сайки гьарца кIюрххил ххал шайва тIива, цила ца хъун бакъасса ахъувунгу дуркIун, дургьумуниха къуллугъ буллай, гъирарай зузисса дянивсса оьрмулул ца хъамитайпа. Га хъамитайпалул буллалисса исвагьисса кушулухгу ялугьлай, пик­рирду балглагисса цал бакIравун ва дакIнивун цакуну бувххуна тIива ганиннин къабувххун бивкIсса кунма чIалачIисса пикри: «Цукунсса бикIан бюхъайссар дунияллий танияр хъунмасса талихI», — куссия тIива Надирдул цахьва цала. – Тархъансса дунияллий цува заллусса аьрщарал парчлуй цалла каних дургьусса ахънилсса ва ахъулссагу ххяххан дуллай, Заннайнгу щукрулий ялапар хъанахъаврияр хъунмасса талихI. Ча, хIакьинугу Лакку аьрщарай жура дуллалисса даврил мяънагу хъинну хъуннассар, бюхттул­ссар. Яхъанахъияра уздансса бу­ттал аьрщарай узданну, ххяххан буллай мурхьругу, хъуни буллай оьрчIругу, хъамакъабитлай буттахъал аманат­ругу.
Ва акциялун хасну бугьансса 500 ттарлил мурхь лавсун увкIун ия Гъуниннал вацIлул хозяйствалул каялувчи Исмяил Исмяилов.
ТIабиаьт дуруччаврийн багьайсса райондалул конкурсрай хьхьичIунсса кIанттурду бувгьусса КIундиннал, Кьубиял, Гъумучиял ва ШавкIуллал школарттал дуклаки оьрчIал ккаккан дурна Экологиялул шинан хас дурсса программа.
Шадлугъ къуртал хьуну махъ цинявппа лавгуна Хан-Муртазааьлил гьайкалданучIан. Гикку виваллил иширттал министр ва шагьрулия бувкIсса хъамал, райондалул каялувчитал гьурттуну, райондалул виваллил иширттал органнал зузалтрал ва Гъумучиял школалул дуклаки оьрчIал бувгьуна ттарлил мурхьру. Буллалисса марххала лажиндаравух бишлашисса, кьуру кIинттуллагу къадикIансса дякъил замгьарданувух ца цучIав тий-шийнай къавхьуна мурхьру бугьанцIа, хIатта мюрщисса оьрчIрува.

Зулайхат Тахакьаева