ЧIава артистътурал ххувшаву

Вай гьантрай Москавлив Молчановлул цIанийсса щалва Аьрасатнал оьрчIал творчествалул III-сса фестиваль хьунни. Микку шанна номинациялий ххув хьуну, МахIачкъалалив зана хьунни Кировуллал райондалийсса Богатыревкалиясса дуклаки оьрчIру.

Щалва билаятрайсса чIярусса регионная бувкIсса ттуршахъул гьурттучитурал гьунардан кьиматру бивщуну бур Чайковскийл цIанийсса Москавуллал консерваториялул, Щукиннул цIанийсса институтрал ва Гнесиннул академиялул преподавательтурая сакин бувсса жюрилул. МахIачкъалалиясса «Гьавас» тIисса театрданул студиялул чIава гьурттучитал гьанавиххину бакъагу бакъахьунссия, цанчирча щалва Ухссавнил Ккавкказуллая фестивальданий так вай бивкIун бур. Жюригу хъиннува махIаттал хьуну бур, ва студия хъун дакъасса шяравасса бушиву кIул шайхту. «ЧIивимур театрданул сахIна» тIисса номинациялий вайннал ккаккан бувсса «Зоял махъра-махъсса кьини» тIисса постановка кIилчинмур кIанттун лайкь хьуну дур. Хаснува хъинну дакI даркьуну дур вайннан Зоя Космодемьянскаял роль дургьусса Бурлият Ибавовал аьс бан хьхьичI бувсса бюххансса ихтилатрай. Ванин буллуну бур хасъсса диплом.
Хъирив хьусса «Художествалул махъ» тIисса номинациялийгу Бурлият лайкь хьуну бур дипломран.
ОьрчIру шаппай занашавривун вайннащал хьунаавкьуну ур Кировуллал райондалул бакIчи СалихI Сагидов, вай райондалул халкьуннал чулуха барчагу бувну, грамотарттугу дуллуну, пишкаш бувну бур чIава артистътуран ттизаманнул микрофонну. Мукунма райондалул бакIчинал махъ буллуну бур театрданул вузирдавун буххан ччисса оьрчIан цащава шайсса кумаг бан.

З. АьбдурахIманова