ЛяличIисса багьу-бизулул лишанну

Апрельданул 8-нний МахIачкъалалив ДР-лул Миллатрал политикалул министерствалучIасса Дусшиврул къатлуву хьунни тIивтIу къапулул кьини. Мунил лагрулий Дусшиврул къатлувун бувкIун бия ДР-лул ХIукуматрал Председательнал цалчинма хъиривчу Анатолий Карибов, ДР-лул миллатрал политикалул министр Татьяна Гамалей ва ДР-лул культуралул министр Зарема Буттаева.

Дусшиврул къатлул директор Аида Аьлиевал ккаккан бунни хъамаллуран ДР-лул БакIчи Рамазан АьбдуллатIиповлул сипталийну бувсса Дагъусттаннал халкьуннал аслийсса культуралул модельданул центрданул парча – Дусшиврул къатлул творчествалул коллективрал проект.
Дагъусттаннал халкьуннал ляличIисса мурцIнин цIа дур «Пукьа» («Сакля»), мунивун духлай дур Дагъусттаннал халкьуннал культура, багьу-бизу чIалачIи буллалисса ттуршунния лирчусса затру, ми ларсун бувкIун бур жулла республикалул личIи-личIисса кIанттурдая. Эмаратну бурган бувсса художествалул чанналу чIалачIисса хьхьичIазаманнул матахIрах бурувгукун, мяйжаннугу зунттал шяравусса ца пукьлувун багьсса кунмасса асар хъанай бур. Сиптачитурал бусаврийн бувну, ва майдан хъанай бур экскурсияртту, мастер-классру, творчествалул семинарду дуллансса кIануну.
— Жул мурад – МахIачкъала шагьрулул жяматран ва хъамаллуран, махъа нанисса жагьилтуран ккаккан бавур цуксса авадансса ва ляличIисса культура дуссарив Дагъусттаннал халкьуннал, — тIий бур Аида Аьлиева.
Хъунисса дахханашивур­тту хьуну дур Аьрасатнал халкьуннал дусшиврул музейравугу. Ккаккиялун дирхьуну дур Ухссавнил Ккавкказуллал федерал округрал циняв регионнаясса материаллу, Заккавкказуллал ва Каспийрал зуманицIухсса паччахIлугъирттал стендру. Зал чIюлу буллай бур оьруснал халкьуннал янна-калул, «Халкьуннал дусшиву» цIанилусса дарбант бартбисулул. Музейрал давуртту найнна дур.