Тталат кьини, апрель зурул 25-нний МахIачкъалаллал шагьрулул библиотекалуву хьунни революционер, драматург, шаэр, публицист, редактор Гьарун Саэдовлул цалчинсса «Илчи» кказит итабавкьуну 100 шин шаврин хас бувсса мажлис.
КIулсса куццуй, хIакьину жула щалагу миллатран ххира хьусса «Илчи» кказитрал мархха наниссар 1917 шинал Гьарун Сэдовлул ва Курди Закуевлул лакку мазрай итабакьлай бивкIсса, жула миллатрал тарихраву ва культуралуву агьамсса кIану бувгьусса «Илчи» кказитрая.
Та шинал итабавкьуссар бувагу 9 кказит, амма ми кказитрай бивщусса ва ххал бивгьусса масъалартту, хIакьинусса кьинигу жува хьунабакьлакьисса масъалартту бур. Кказитрал 9-мур номерданий рирщуну диркIсса «НакIлил маз» тIисса макьала ккалаккини бувчIлай бур, танийгу дурккусса, за кIулсса жула аьлимтал буруккинттарай бивкIшиву жула ниттил маз буруччаврия.
— Гьарца миллатрал накIлил маз маданиятрал ва камилатрал ламур. Цала мазрал кьадру кIул къавхьусса халкьуннаща маданиятрал дунияллий уттарашиву ядан гьич мумкин бакъассар. Вайннухлуну Дагъусттаннал халкьуннал цала цала мазру ххуй бан хIарачат буллан аьркинссар, — чичлай ур революционер, аьлимчу Курди Закуев.
ХIакьинугу жува вайва масъаларттая тIий буру.
«Илчи» кказитрал юбилейран хас бувсса мажлисрал сиптачитал хьунни МахIачкъалаллал шагьрулул культуралул управлениялул хъунама Фарид Абалаев, шагьрулул библиотекардал системалул хъунмур Зулпат Ушанова.
https://www.youtube.com/watch?v=YWUP_UNArOw
Мероприятие хIадурдуллай хъунмасса захIмат бивхьуну бия библиотекалул зузала Заза ХIасанова. Мажлис бачин бувнугу ва цуппа бия. Шикку гьуртту хьун бувкIун бия 25 шинай «Илчи» кказитрал хъунмур редакторну бивкIсса, Аьрасатнал Культуралул лайкь хьусса зузала Качар ХIусайнаева, ДНЦ РАн-далул хьхьичIунсса элмийсса зузала, искусствоведениялул кандидат Гулизар Султанова, Дагъусттаннал Халкьуннал шаэр Ссугъури Увайсов, Ккурккуллал школалул директор Даниял Магьдиев, Дагъусттаннал университетрал преподаватель Хазина Аминова, Дагъусттаннал радиолул лакралмур редкациялул хъунмур Тамара Закарьяева ва шагьруллул школардай лакку мазрал дарсру дихьлахьисса учительтал.
Мажлис тIитIлай ихтилат бунни Качар ХIусайнаевал. Ванил бувсунни «Илчи» кказитрал тарихрая, нукIугу, уттигу «Илчи» кказитрал гьаз буллалисса масъаларттая. Ванилгу, цинявппагу ихтилатчитуралгу буруккин ниттил маз ябавриясса, му бухлаган къабитансса чаранну лякъавриясса бия.
Цурда ца лакрахун дагьайсса мероприятиярду лях гьан къаритайсса, буниялагу мазрайгу, миллатрайгу дакI цIуцIисса Даниял Магьдиевлул гьар муданкунма ва ххуллухгу асар хьунсса ихтилат бунни. — «Илчи» кказит къабивкIссания, бачIи миллат ттуруллах личIанссия тIий, — ванал барчаллагь увкунни бигьа дакъасса даву дуллалисса кказитрал зузалтрахь.
Цила ихтилатраву Гулизар Султановал кIицI лавгунни лакку маз буруччаву мурадрайсса давуртту, кулпатрава байбивхьуну ХIукуматрал хъуниминайн бияннин дуллан аьркиншиву.
Гьарун Саэдовлул оьрмулуя гьарта-гьарзану бусласисса ихтилат бунни МахIачкъалаллал 16-мур школалий лакку мазрал дарсру дихьлахьисса ПатIимат Аьлиевал.
Лакку мазрайсса назмурду пасихIну дурккунни дуклакки оьрчIал.
Мажлис хъиннува ххуй бунни лакку мазрай балайртту увкусса Дагъусттаннал университетрал студентка Равганият Зайнуллаевал ва Культпросвет училищалул студент ХIасан Сулаймановлул.
https://youtu.be/UqrX2Bp3gwU
Ниттил маз буруччаврил цIаний бихьлахьисса захIматрахлу грамотарду дуллунни Ккурккуллал школалул директор Даниял Магьдиевлун, МахIачкъалаллал 36-мур школалий дарсру дихьлахьисса Джума ХIажиевнан, МахIачкъалаллал 16-мур школалул учительница ПатIимат Аьлиевнан.
Мажлис лакьлакьисса ихтилатгу бувну, шикку гьуртту хьун бувкIминнахь барчаллагь увкунни Зулпат Ушановал.
А.Аьбдуллаева,
И. Саидова.
